यस वर्षको कर्मयोगी बद्री पहाडी समाजसेवा पुरस्कार उमा वादीलाई

काठमाडौँ - यस वर्षको कर्मयोगी बद्री पहाडी समाजसेवा पुरस्कार प्रदेश सांसद, अभियान्ता तथा प्रभावशाली महिला उमादेवी वादीलाई प्रदान गरिएको छ । मानव अधिकार तथा शान्ति समाजद्वारा स्थापित ‘कर्मयोगी बद्री पहाडी समाजसेवा पुरस्कार‘-२०७७ मानव अधिकार र सामाजिक न्यायका लागि उल्लेखनीय योगदान गरेकोमा उमादेवी वादीलाई प्रदान गरिएको शान्ति समाजले जनाएको छ । उमादेवी, वादी समुदायका महिलाको अधिकार प्राप्तिका लागि सामाजिक तथा राजनीतिक लडाई लड्ने अग्रणी नेतृ हुन् । वादी समुदायको अधिकारका लागि उनले पहिलोपटक सिंहदरबार अगाडि अर्धनग्न भएर विरोध प्रदर्शन गर्ने वादी समुदायको नेतृत्व गरेकी थिइन् । उमादेवी संसारकै प्रभावशाली बीबीसीकाे १०० महिलाभित्र नेपालबाट परेकी महिला नेतृ पनि हुन् ।  

---

७३ औँ अन्तर्राष्ट्रिय मानव अधिकार दिवसको पूर्व सन्ध्यामा २०७८ मंसिर २३ गते शान्ति समाजद्वारा काठमाण्डौमा आयोजित कार्यक्रममा रक्षामन्त्री डा. मिनेन्द्र रिजालले उमादेवीलाई १ लाख १० हजार पुरस्कार राशीसहित सम्मानपत्र प्रदान गरेका हुन् । कार्यक्रमका प्रमुख अतिथि रक्षा मन्त्री डा. रिजालले मानव अधिकार, सामाजिक न्यायका लागि योद्धा उमादेवी वादीले निर्वाह गरेको विशिष्ट भूमिकाको चर्चा गरेका थिए । 

शान्ति समाजका सभापति गोविन्द खनालको सभापतित्वमा सम्पन्न कार्यक्रममा पुरस्कृत व्यक्तित्व सुदुरपश्चिम प्रदेश सभा सदस्य उमादेवी वादी, प्रदेश १ सांसद एवं पूर्व प्रदेशमन्त्री उषाकला राई, शान्ति समाजका पूर्व सभापतिहरु होमकान्त चौलागाई, डा. गंगाधर अधिकारी, उत्तम पुडासैनी, संस्थापक सदस्य कृष्ण कँडेल, महासचिव रामकृष्ण बराल, कोषाध्यक्ष जगन्नाथ पुडासैनी र पूर्व उपसभापति रेनुका पौडेलले पुरस्कार सन्दर्भ र सामाजिक न्यायको आन्दोलनमा शान्ति समाजको भूमिकाबारे  प्रकाश पारेका थिए । २०७६ सालमा स्थापित यो पुरस्कार गत वर्ष पूर्व प्रमुख निर्वाचन आयुक्त भोजराज पोखरेललाई प्रदान गरिएको थियो ।