भक्तपुरमा करेन्ट लागेर एकको मृत्यु

भक्तपुर : भक्तपुरमा सडकबत्ती जडान गर्ने क्रममा करेन्ट लागेर एक जनाको मृत्यु भएको छ । मंगलबार दिउँसो सवा १ बजे भक्तपुर नगरपालिका-२ इतापाकोमा सडकबत्ती जडान गर्ने क्रममा करेन्ट लागेर एक जनाको मृत्यु भएको भक्तपुर प्रहरीले जनाएको छ। 

करेन्ट लाग्दा एक जना व्यक्ति तारमै अड्किएको र अर्को पछारिएको भन्‍ने खबर पाएपछि प्रहरीको टोली घटनास्थलमा पुगेको थियो । खबरपछि बिजुलीको लाइन काट्न लगाई एम्बुलेन्ससहितको प्रहरी टोली उद्दारमा खटिएको थियो । 

---

गम्भीर घाइते भएका दुवै जनालाई भक्तपुर अस्पताल पुर्‍याउँदा दोलखा मेलुङ गाउँपालिका-५ का २३ वर्षीय रामकुमार बुढाथोकीको मृत्यु भएको महानगरीय प्रहरी परिसर, भक्तपुरले जनाएको छ । अर्का एक जना विरामीको उपचार भइरहेको प्रहरीले जनाएको छ ।