समाज

युक्रेनमा रुसविरुद्ध युद्ध लड्दै नेपालका प्रताप बस्‍नेत

फागुन १८, २०७८ बुधबार १८:२४ बजे

काठमाडौँ : रुसविरुद्धको युद्ध लड्न युक्रेनका तर्फबाट नेपाली युवा प्रताप बस्नेत पनि लामबद्ध भएका छन् । रुसविरुद्धको युद्ध लड्न आफू सेनामा भर्ती भएको उनले बताएका छन् ।

सामाजिक सञ्जालमा भाइरल भइरहेको भिडियोमा उनले आफ्नो घर नेपाल भएको र नाम प्रताप बस्नेत भएको खुलाएका छन् । उनले आफूलाई युक्रेनले धेरै थोक दिएकाले अहिले परेका बेला युक्रेनका लागि रुसविरुद्ध युद्ध लड्न लागेको बताएका हुन् ।

रुसले आक्रमण गरेपछि युक्रेनमा रहेका धेरै नेपाली राजधानी किभबाट भागेर छिमेकी देश पोल्याण्ड, बेलारुस, जर्मनी लगायतका देश पुगेका छन् । उनीहरु त्यहाँँबाट नेपाल फर्किने तयारीमा छन् । तर किभमै रहेका नेपाली युवा बस्नेत भने भाग्न छाडेर युक्रेनका लागि रुसविरुद्ध युद्ध लड्न सेनामा भर्ती भएका हुन् ।

युक्रेनलाई यतिबेला ठूलो सहयोगको खाँचो रहेको भन्दै उनले मानवीयताका लागि आफू युद्धमा होमिएको पनि बताएका छन् । साथै उनले आफू युद्ध लड्न सेनामा भर्ती हुन लाग्दा डर नभई गौरव लागेको समेत बताएका छन् ।