अपहरित बालिकाकाे २४ घण्टा नबित्दै सकुशल उद्धार

जनकपुरधाम – अपहरण भएकाे २४ घण्टा नबित्दै एक बालिकालाई धनुषा प्रहरीले सकुशल उद्धार गरेकाे छ ।

बिहीबार साँझ करिब ७ बजे जनकपुरधामको पुल्चोकबाट अपहरणमा परेकी ४ वर्षीया बालिकालाई प्रहरीले शुक्रवार दिउँसाे करिब ५ बजे धनुषाको बिदेह नगरपालिका वडा नम्बर ८ बफैबाट अपहरणमुक्त गराएकाे हाे ।

---

अपहरणमा संलग्न एक महिलासहित ४ जनालाई पक्राउ समेत गरिएकाे प्रहरी उपरीक्षक बसन्त रजौरेले जानकारी दिए।

जनकपुरधाम उपमहानगरपालिका वडा नम्बर १६ पुल्चोकका ध्रुव मण्डलको ४ वर्षीया छोरीलाई घरमा खेल्दै गर्दा अपहरण गरिएको थियो । अपहरणकारीले शुक्रबार बिहान फरक–फरक नम्बरबाट फोन गरी १५ लाख फिरौती माग गरेका थिए ।

जिल्ला प्रहरी कार्यालय धनुषाका प्रहरी नायव उपरीक्षक दिपक राय नेतृत्वको टोलीले बालिकालाई अपहरण मुक्त गराइएको र अपहरणकारीलाई पक्राउ गर्न प्रहरीले ४ राउण्ड हवाई फायर गरेको प्रहरी उपरीक्षक रजौरेले बताए ।