रेल उद्घाटन रिपोर्टिंगमा गएका पत्रकारहरु पीडै–पीडामा

जनकपुरधाम – कुर्था—जनकपुरधाम—जयनगर रेल सेवा उद्घाटन रिपोर्टिंङमा गएका पत्रकारहरुले राम्रै पीडा भोग्नु पर्‍यो, शनिवारका दिन । भारतीय महावाणिज्य दूतावास वीरगञ्जको निमन्त्रणामा रेल सेवा उद्घाटनमा भारतीय भूमि जयनगर गएका आठ पत्रकारलाई अढाई घण्टासम्म बोगी(डिब्बा)भित्र थुनेर राखियो । अनि ८ घण्टासम्म प्यासमा ।

रेल उद्घाटन निम्ति शनिवार बिहान ७ बजे बस चढाइयो । अनि जयनगर लगियो । तर, बस्ने ठाउँसमेत दिइएन । पत्रकार लेखिएको लाइनका कुर्सीमा बस्न खोज्दा भारतीय सुरक्षाकर्मीहरुले नेपाली पत्रकार यहाँ बस्न मिल्दैन भनी उठाइयो ।

---

जहाँ बस्दा पनि भारतीय सुरक्षाकर्मीले उठाउँदै अन्ततः दर्शक दीर्घाको पछाडिको लाइनमा बस्न लगाइयो । उत्साहित हुँदै रिपोर्टिङका लागि गएका पत्रकारहरु भारतीय सुरक्षाकर्मी र रेल्वे पदाधिकारीहरुको अनौठो व्यवहारले दिक्क भए । भारतीय सुरक्षाकर्मी र रेलवे पदाधिकारीहरुको अनौठो व्यवहारले दिक्क हुँदै त्यहाँ नबसी स्टेशन घुमिफिर गरी रिपोर्टिंग गरे ।

रेल सेवा उद्घाटन इतिवृत्तान्त रिपोर्टिङमा गएका केही पत्रकारहरुले बस्ने ठाउँ पाए । केहीले बिहान ११ बजेसम्म चर्को घाममा डुल्दै समय बिताउनु पर्‍यो । नेपाल पत्रकार महासंघ धनुषाका उपाध्यक्ष अवधेश कामतले पीडा सुनाउँदै भन्छन्, ‘जनकपुरधामबाट नेपाली पत्रकारहरुलाई बसमा चढाएर स–सम्मान जयनगरसम्म लगियो । तर त्यहाँ पुगेपछि त न बस्ने ठाउँ दिइयो, न त रिपोर्टिंङ गर्न दियो । बरु अढाई घण्टासम्म चर्को घाममा तातिएका रेलको बोगीमा थुनेर राखियो ।’

उनले भने, ‘करीब ७ घण्टापछि २ बजेतिर एउटा खाजाको प्याकेज जनकपुरधाम फर्कने क्रममा दिइयो । तर पानी चाहिँ मात्र दुई सय एमएल बराबरको एक बोतल थमाइयो । तर, बोगीमा थुनिएर बसेका बेला पत्रकारहरुलाई प्यासले घाँटी सुकेको थियो ।’ पत्रकार राजन झा भन्छन्, ‘हामीहरुलाई ११ बजे उद्घाटन हुन्छ भनी हामीलाई रेलको बोगीभित्र बसाइयो । जसरी–त्यसरी दुई अढाई घण्टा प्यास अनि तातिएको रेल बोगीमा समय बिताए पनि न त उद्घाटनको फोटो खिच्न पायौं न दृश्य देख्न पायौं ।’

बोगीभित्र पसिसकेका नेपाली पत्रकारहरुलाई भारतीय तथा नेपाली सुरक्षाकर्मीले बाहिर निस्किनै दिएनन् । उता दिल्लीमा नेपाल र भारत दुवै देशका प्रधानमन्त्रीले झण्डा हल्लाएपछि यता रेल चल्न थाल्यो । ‘रेल चल्न थालेपछि स्टेशनमै छुट्छौं कि भन्ने सोचेर पत्रकारहरु रिपोर्टिङ गर्न तल झर्न साहस गरेनन्’ नेपाल खबरका पत्रकार शैलेन्द्र क्रान्तिले भने ।

पत्रकार सुमित मिश्रका अनुसार, बोगी भित्र थुनिएका बेला त्यहाँ राखिएका बोत्तलका पानी पिउन खोज्दा सुरक्षाकर्मीहरुले हातैबाट खोसेका थिए । अढाई घण्टासम्म पत्रकारलाई बोगीभित्र कडा सुरक्षाका बीच थुनेर राखियो । सुरक्षामा खटिएका ती सुरक्षाकर्मीहरुले तल ओर्लियौं भने फेरि चढ्न दिन्न भनेपछि नेपाली पत्रकार रिपोर्टिंग त के पानी खान समेत तल ओर्लिन साहस गरेनन् ।

रेलभित्र थुनिएका बेला नेपाल रेल्वेका महाप्रबन्धक निरञ्जन झा पत्रकारहरुको हालखबर सोधखोज गर्न आए । पत्रकारहरुले खाजा र पानीको समेत व्यवस्था छैन भनी पीडा सुनाए । त्यसपछि महाप्रबन्धक झाले तत्काल व्यवस्था गर्छु भनी आश्वासन दिए । तर उनी जनकपुरधाम आइपुग्दासम्म पत्रकार बसेको ती बोगीमा फर्केर आएनन्।

८ घण्टापछि करीब ३ बजे पुनः जनकपुरधाम आइपुगेका भोक–प्यासले रन्थनिएका पत्रकारहरु नेपाल रेल्वे कम्पनीद्वारा आयोजित उद्घाटन समारोह कार्यक्रमका रिपोर्टिंग गर्न साहस जुटाउन सकेनन् । उनीहरु रेल्बाट ओर्लिने बित्तिकै कोही आफ्ना घर त कोही नास्ताको पसल तिर लागेका थिए । यता पत्रकारहरुलाई भोग्नु परेको पीडाबारे नेपाल रेलवे कम्पनीका महाप्रबन्धक निरञ्जन झा भन्छन्, ‘हाम्रा पत्रकारहरु भारतीय महावाणिज्य दूतावासको निमन्त्रणामा गएको हुँदा दूतावासले व्यवस्थापन गरे होलान् भन्ने हामीलाई लागेको थियो ।’