हेमजा गोल्डकप : एभिनियर क्लब सेमिफाइनलमा

पाेखरा। एपीएफ क्लबलाई ४–१ गोलले हराउँदै अफ्रिकी क्लब एभिनियर हेमजा गोल्डकपको सेमिफाइनलमा प्रवेश गरेको छ । हेमजा युनाइटेको आयोजनामा जारी छैटौं हेमजा गोल्डकप फुटबल प्रतियोगिता अन्तरगतको अन्तिम क्वाटरफाइनल खेलमा एपीएफलाई हराउँदै एभिनियरले सेमिफाइनलमा चर्च ब्वाइजसँगको भेट पक्का गरेको हो ।

एभिनियरको जितमा विल्लेले २ तथा फ्रेडेरिक र सेमसेमले १-१ गोल गरे भने एपिएफका लागि सविन गुरुङले सान्त्वना गोल फर्काए । खेलको २७ औं मिनेटमा परिवर्तित खेलाडी सेमसेमले गोल गर्दै एभिनियरलाई अग्रता दिलाए । पहिलो हाफमा थप गरिएको अतिरिक्त समयमा फ्रेडेरिकले उत्कृष्ट गोल गर्दै अग्रता दोब्बर पारे।

---

दोस्रो हाफमा डिफेण्डर मानबहादुर राना दोहोरो पहेलाे कार्ड पाएर बाहिरिएपछि एपीएफ १० खेलाडीमा सिमित भएको थियो । दोस्रो हाफको ८६ औं मिनेटमा एभिनियरका परिवर्तित खेलाडी विल्लेले गोल गर्दै अग्रता तेब्बर पार्दा जित नजिक पुगेको थियो । उनले खेलको ९३ औं मिनेटमा व्यक्तिगत दोस्रो गोल गर्दै जित सहज गरे ।

एपीएफका लागि सविन गुरुङले ९४ औं मिनेटमा एकमात्रै गोल फर्काए । खेलमा एभिनियरका खेलाडी बिल्ले म्यान अफ दि म्याच समेत घोषित हुँदै ५ हजार रुपैयाँ र ट्रफि प्राप्त गरे । प्रतियोगिता अन्तरगत बुधबार पहिलो सेमिफाइनल खेल आयोजक हेम्जा युनाइटेड र खुमलटारबीच हुँदैछ भने विहिबार दोस्रो सेमिफाइनल खेल एभिनियर र चर्च ब्वाइज क्लबबीच हुनेछ ।