आइपीएलमा मुम्बईको दबदबा कायम रहला ?

इन्डियन प्रिमियर लिग (आइपीएल) को उपाधीका लागि मंगलबार मुम्बई इन्डियन्स र दिल्ली क्यापिटल्सबीच प्रतिष्पर्धा हुँदैछ । आइपीएल इतिहासकै सर्वाधिक सफल टोली मुम्बईले जारी प्रतियोगितामा पनि प्रभावशाली प्रर्दशन गरिरहेको छ । यता मुम्बईमै जन्मिएका श्रेयस ऐरको नेतृत्वमा रहेको दिल्ली भने यो प्रतियोगितामा अनुमान नै गर्न नसकिने तरिकाले खेलिरहेको छ । 

कोभिड-१९ का कारण भारतमा राष्ट्रव्यापी लकडाउन भएपछि आइपीएललाई संयुक्त अरब इमिरेट्स (युएई) तिर सारिएको थियो । पछिल्लो ५२ दिनदेखि युएईको दुबई, अबुधाबी र शारजाहमा आइपीएलका खेलहरू भइरहेका छन् । 

---

रोहित शर्मा आइपीएलकै सर्वाधिक सफल कप्तान हुन् । उनी यो प्रतियोगिता पाँचौ पटक जित्‍न आतुर छन् । यता दिल्ली भने पहिलो पटक प्रतियोगिताको फाइनलमा पुगेको हो ।
आईपीएलको इतिहासमा सधै योग्य टीमहरु फाइनलमा पुगेका छैनन् । तर, यसपटक भने मुम्बई र दिल्ली दुवै उपाधि भिडन्तका लागि योग्य टोली हुन् । मुम्बईले १५ मध्ये १० खेल जितेको छ भने दिल्लीले त्यो भन्दा एक खेल बढी खेल्दै नौ खेल जितेको छ । 

जारी प्रतियोगितामा मुम्बईले जत्तिको सन्तुलित प्रर्दशन कमै टीमहरूले गरेका छन् । तथ्यांक केलाउने हो भने, मुम्बईका खेलाडीहरुले १ सय ३० छक्का प्रहार गरेका छन् । उता दिल्लीको खातामा भने ८४ छक्का मात्र छ ।   

मुम्बईका धेरै खेलाडीहरूले जारी प्रतियोगितामा सम्झनलायक प्रर्दशन गरेका छन् । त्यस्ता खेलाडीहरु मध्येका एक हुन् सूर्यकुमार यादव । उनले ६० चौका र १० छक्का प्रहार गरेका छन् । उनी तिब्र गतिका बलरहरूका अगाडी बलियो तरिकाले प्रस्तुत भएका छन् । जसका कारण उनका प्रशंसकहरुको संख्या बढेको छ । त्यस्तै, इशान किशनले जारी आइपीएलमा २९ छक्का प्रहार गरेका छन् भने किरोइन पोलार्डले १९० को स्ट्राइक रेटमा व्याटिङ गरिरहेका छन् । 

यता दिल्लीसँग कागिसो राबडा र एनरिक नोकिअजस्ता बलरहरू बलियो हतियारका रूपमा छन् । उनीहरुले यादव, किशन र पोलार्डलाई रोक्न सक्छन् । तर मुम्बईसँग हार्दिक पान्डेय र कुर्नाल पान्डेयजस्ता खेलाडीहरू पनि छन् जो खेलमा निर्णायक प्रभाव पार्न सक्ने हैसियत राख्छन् । 

दिल्लीका शिखर धवन आफ्नो आइपीएल करियरकै उत्कृष्ट लयमा छन् । जारी प्रतियोतिामा उनले ६ सय तीन रन बनाएका छन् । जुन सर्वाधिक रन बनाउने केएल राहुलको भन्दा ६७ रनले मात्र कम हो । तर उनलाई फाइनलमा जसप्रित बुमराह र टे«न्ट बोल्टजस्ता बलरहरूलाई माथ खुवाउनु पर्ने चुनौति छ ।  

पछिल्ला तीन खेलमा, मुम्बईले दिल्लीलाई सजिलै पराजित गरेको छ । मुम्बई चौथो पटक पनि भाग्यमानी हुने दाउमा छ । तर दोस्रो क्‍वालिफायरमा मार्कस स्टोनिक्सले गरेको अलराउन्ड प्रदर्शनले के देखाउछ भने मुम्बईलाई रोक्न सक्ने खेलाडीहरू दिल्लीसँग छन् । तर ऐर र रिशभ पन्त ब्याटिङमा खासै जम्‍न नसकिरहेको अवस्थामा दिल्लीका सिमरोन हेटमायरले आफ्नो लयलाई कायम राख्‍न आवश्यक रहन्छ । उपाधि भिडन्तमा दिल्लीका लागि रविचन्द्रन आश्विन पनि महत्वपूर्ण खेलाडी बन्‍न सक्छन् । विशेषगरी पावरप्लेमा उनको भूमिका दिल्लीका लागि गेमचेन्जर बन्‍न सक्छ । 

यसपटकको आइपीएललाई रोमान्चक बनाउने धेरै कारक तत्वहरू छन् । तर पनि दर्शकहरुले महेन्द्रसिंह धोनीलाई भने याद गर्नेछन् । आइपीएलका पछिल्ला दुई संस्करणमा चेन्नई सुपर किंग्सलाई फाइनलमा पु¥याएका धोनी यसपटक भने क्वालिफायर सम्मै पुगेनन् । उनी बिनाको आइपीएल फाइनल दर्शकहरूका लागि केही खल्लो हुन सक्छ । 
एजेन्सीहरूको सहयोगमा