लामाचाैर कप : आर्मीलाई हराउँदै पुलिस फाईनलमा

पाेखरा । त्रिभुवन आर्मी क्लबलाई पराजित गर्दै नेपाल पुलिस क्लब पाेखरामा जारी लामाचौर कप महिला तथा पुरुष राष्ट्रिय भलिबल प्रतियोगिताकाे फाइनलमा प्रवेश गरेको छ । नव आदर्श सामुदायिक विकास समाजको आयोजनामा भएकाे लामाचौर तीज महोत्सव–२०७९ अन्तर्गत भलिबल प्रतियाेगितामा पुलिसले आर्मीलाई ३–१ को सेटमा पराजित गरेकाे हाे ।

लामाचौरस्थित इन्द्र राज्यलक्ष्मी माविको भलिबल कोर्टमा बुधबार भएको खेलकाे पहिलो सेटमा पुलिसले आर्मीलाई २६-२४, २५–१९, १८–२५ र २५–१९ को अंकमा हराउँदै गण्डकीसँगकाे भेट पक्का गरेकाे हाे । गण्डकीले मंगलबार एपिएफलाई ३–२ ले हराउँदै फाइनलमा प्रवेश गरिसकेकाे छ । आर्मीले अब तेस्रो स्थानको लागि एपीएफसँग खेल्नेछ ।

---

महिलातर्फ उपाधिका लागि बुधबार नेपाल पुलिस क्लब र न्यू डायमन्ड युथ स्पोर्ट्स क्लबबीच प्रतिस्पर्धा हुनेछ । पुरुष तर्फ गण्डकी प्रदेश र नेपाल पुलिस क्लबबीचकाे फाइनल प्रतिस्पर्धा पनि बुधबार नै हुँदैछ । प्रतियाेगिताकाे महिला तथा पुरुष दुवै तर्फकाे विजेताले समान १ लाख ५० हजार १ सय ११, उपविजेताले १ लाख १ सय ११ र तेस्रो हुनेले ५० हजार १ सय ११ रुपैयाँ प्राप्त गर्नेछ ।