राष्ट्रिय खेलकुदः लङजम्पमा दुई कीर्तिमान

पोखरा- नवौँ राष्ट्रिय खेलकुद अन्तर्गत एथलेटिक्सको लङजम्पमा दुई कीर्तिमान कायम भएको छ । मंगलबार पोखरा रंगशालामा पुरुष र महिला दुबैतर्फ कीर्तिमान कायम भएका हुन् ।

महिलातर्फ त्रिभुवन आर्मी क्लबकी जयरानी थारुले ५.५८ मिटर जम्प गर्दै नयाँ कीर्तिमान कायम गरेकी हुन् । उनले आफ्नै नाममा रहेको कीर्तिमानमा सुधार गरेकी हुन् । यसअघि जयरानीद्ये राष्ट्रपति रनिङशिल्डमा यसै वर्ष ५.४७ मिटर जम्प गरेकी थिइन् ।

---

यसैबीच लुम्बिनी प्रदेशकी निशा चौधरीले ५.४९ मिटर जम्प गर्दै रजत तथा एपीएफकी सिला चौधरीले ५.३१ मिटर जम्प गरी कास्य हात पारिन् ।

पुरुषतर्फ भने एपीएफका सलिम देवानले नयाँ कीर्तिमान कायम गरे । सलिमले ७.०६ मिटर जम्प गरे । यसअघि सन् १९९९ मा पाकिस्तानको इस्लामाबादमा कृष्ण बहादुर गिरीले ७ मिटर जम्प गरेका थिए ।

पुरुषतर्फ नै आर्मीका डिल्ली खत्रीले ६.९८ मिटर जम्प गर्दै रजत तथा गण्डकीका नारायण चौधरीले ६.८२ मिटर जम्प गर्दै कास्य जिते ।