च्याम्पियन्स लिग जित्दै सुपर लिगलाई ओझेलमा पार्ने दाउमा बेन्जेमा

काठमाडौँ: युरोपका केही ठूला क्लबलाई सुपर लिग सपनातर्फ डोहोर्‍याउने ब्यक्ति फ्लोरेन्टिनो पेरेज हुन् । आर्थिकरुपमा सुपर लिग च्याम्पियन्स लिग भन्दा बढी फाइदाजनक हुने उनको तर्क थियो । यद्यपि त्यस्तो विद्रोही लिगको सपना तुहियो । 

उनै पेरेजको क्लब रियल म्याड्रिडले मंगलबार चेल्सीको सामना गर्‍यो । च्याम्पियन्स लिग सेफिाइनलको पहिलो लेगमा । खेल बराबरीमा टुङ्गिए पनि रियलले महत्वपूर्ण सन्देश प्राप्त गर्‍यो । युरोपियन क्लब फुटबलमा हालकै संरचना पनि रियलले सफलताका लागि कठिन प्रतिस्पर्धा गर्नुछ ।    

---

रियलकै मैदानमा भएको खेलमा अग्रता लियो चेल्सीले । गोल गरे अमेरिकन युवा फरवार्ड क्रिस्टियन पुलिसिचले । तर १५ मिनेटपछि नै रियलले करिम बेन्जेमा मार्फत गोल फर्कायो । जुन फ्रेन्च स्ट्राइकर बेन्जेमाले गरेको छैठौँ च्याम्पियन्स लिग गोल थियो । रियलको जर्सीमा उनले कुल ७१ च्याम्प्यिन्स लिग गोल गरिसकेका छन् । 

रियल अध्यक्ष पेरेजले सुपर लिगको सपना पूर्णरुपमा त्यागिसकेका छैनन् । तर बेन्जेमा र उनका साथी खेलाडी अहिलेलाई च्याम्पियन्स लिगमै केन्द्रित छन् । रियललाई १४ औँ पटक च्याम्पियन्स लिग उपाधि जिताउने लक्ष्यमा छन् । त्यस किसिमको सफलताले सुपर लिग सपना ओझेलमा पर्नसक्छ ।