आहा रारा पोखरा गोल्डकप : ‘ए’ डिभिजन विजेता मच्छिन्द्रलाई ‘बी’ च्याम्पियन चर्च ब्वाइजले हरायो

पोखरा- सहारा क्लब पोखराको आयोजनामा पोखरामा जारी २२ औं संस्करणको आहा रारा पोखरा गोल्डकपमा चर्च ब्वाइज यूनाइटेड सेमिफाइनल पुगेको छ ।

पोखरा रंगशालामा आइतबार भएको दोस्रो क्वार्टरफाइनल खेलमा ‘ए’ डिभिजन विजेता मच्छिन्द्रलाई ३–१ गोल अन्तरले हराउँदै ‘बी’ डिभिजन च्याम्पियन चर्च ब्वाइज अन्तिम चारमा पुगेको हो । चर्च ब्वाइजको जितमा आशिष चापागाईंले दुई गोल गरे । आशिष चौधरीको नाममा एक गोल रह्यो । मछिन्द्रका सौरभ सुब्बाले एक गोल फर्काए ।

---

आशिष चापागाईंले खेलको २३ औं मिनेटमा गोल गर्दै चर्च ब्वाइजलाई सुरुआती अग्रता दिलाएका थिए । पहिलो हाफ सकिन केही समय बाँकी रहँदा चर्च ब्वाइजले आशिषकै गोलमा अग्रता दोब्बर बनायो । पहिलो हाफको अतिरिक्त समयको अन्त्यमा उनले व्यक्तिगत २ गोल गरेका थिए ।

खेलको ६६ औं मिनेटमा आशिष चौधरीले गोल गर्दै चर्च ब्वाइजलाई ३–० को अग्रता दिलाए । त्यसपछि खेलको ८९ औं मिनेटमा मछिन्द्रका सौरभले गोल गरे पनि चर्च ब्वाइज ३–१ ले विजयी भयो । 

उक्त खेलमा २ गोल गरेका आशिष चापागाईं म्यान अफ दी म्याच भए । सोमबार तेस्रो क्वार्टरफाइनल अन्तर्गत त्रिभुवन आर्मी फुटबल क्लब र संकटा क्लबबीच खेल हुनेछ ।