आहा रारा पोखरा गोल्डकप : संकटा सेमिफाइनल प्रवेश

पोखरा- पोखरामा जारी २२ औं आहा रारा पोखरा गोल्डकप फुटबलमा संकटा क्लब सेमिफाइनलमा प्रवेश गरेको छ ।

पोखरा रंगशालामा सोमबार भएको तेस्रो क्वार्टरफाइलनमा विभागीय टोली त्रिभुवन आर्मी फुटबल क्लबलाई ३–१ ले पराजित गर्दै संकटाले अन्तिम चार आफूलाई सुरक्षित गरेको हो । संकटाका लागि विदेशी खेलाडी मेसौके ओलोमोउ र  स्टेफन बिनोङ तथा सुरज जिउ ठकुरीले एक एक गोल गरे । आर्मीका लागि नवयुग श्रेष्ठले गोल गरे । 

---

खेलको १६औं मिनेटमा आर्मीले अग्रता बनाएको थियो । राष्ट्रिय फुटबल टोलीका सदस्य नवयुग श्रेष्ठले पेनाल्टीमा गोल गरे । ३६औं मिनेटमा संकटाले बराबरी गोल फर्कायो । विदेशी खेलाडी मेसौके ओलोमोउले गोल गरे । खेलको ७४औं मिनेटमा संकटाले दोस्रो पटक अग्रता बनायो ।

यसै सिजन क्लबमा अनुबन्ध भएका सुरज जिउ ठकुरीले संकटाका लागि गोल गरे । खेलको इन्जुरी समयमा स्टेफनले तेस्रो गोल गरेका थिए । गोलरक्षक विकेश कुथुलाई बिट गरेर बिनोङले गोल गरेका थिए । खेलको म्यान अफ दि म्याच स्टेफन नै घोषित भए ।

संकटाले फाइनल प्रवेशका लागि अर्काे विभागीय टोली सशस्त्र प्रहरी बलको एपिएफ फुटबल क्लबसँग बुधबार प्रतिस्पर्धा गर्नेछ । मंगलबार अन्तिम क्वार्टरफाइनल अन्तर्गत मनाङ मर्स्याङ्दी क्बल र अमेरिकाको भुटनीज युथ एससीबीच प्रतिस्पर्धा हुनेछ ।