हेटौंडा साइकल रन प्रतियोगिताको उपाधि पुजन मगरलाई

मकवानपुर- हेटौंडा साइकल रन प्रतियोगिताको उपाधि पुजन मगरले जितेका छन् । शनिबार बिहान भएको खुल्ला प्रतियोगितामा निर्धारित २५ किमीकाे दूरी ३८ मिनेट १९.३७ सेकेन्डमा पार गर्दै मगरले उपाधि जितेका हुन् ।

उपाधिसँगै मगरले ५० हजार रुपैयाँसहित ट्रफी प्राप्त गरेका छन् । ३७ मिनेट १४ सेकेन्डमा दूरी पार गरेका राजिव ठाकुर मकवानपुर जिल्लाको स्थायी बसोबासी नभएको पाइएपछि मगरलाई स्वत: प्रथम घोषणा गरिएको हेटाैंडा उपमहानगरपालिकाका खेलकुद शाखाका अधिकृत बसन्तकुमार सिटौलाले बताए ।

---

यसैगरी ३८ मिनेट १९.७७ सेकेन्डमा २५ किमीकाे दूरी पार गर्दै आशिष थापा मगर द्वितीय र ३९ मिनेट ३८.२३ सेकेन्डमा निर्धारित दूरी पार गरेका सुमन आले मगर तृतीय भएका सिटाैलाले जानकारी दिए । द्वितीय र तृतीयले क्रमशः ३० हजार र २० हजार रुपैयाँ प्राप्त गरेको छन् । यस्तै सान्त्वना भएका प्रदीप थापा क्षेत्री र निशान श्रेष्ठले १०–१० हजार रुपैयाँ प्राप्त गरेका छन् ।

शनिबार बिहान हुप्रचौरबाट सुरु भएर गर्दौइ, क्याम्पा, हटिया र कमाने हुँदै पुनः हुप्रचौरमा आएर प्रतियोगिता समापन भएको थियो । प्रतियोगितामा ५० जनाको सहभागिता रहेको थियो ।

नगर खेलकुद विकास समितिका अध्यक्ष चन्द्र शाहीको सभाध्यक्ष तथा हेटौंडा उपमहानगरपालिकाकी प्रमुख मिनाकुमारी लामाको प्रमुख आतिथ्यतामा भएको प्रतियोगितामा जिल्ला खेलकुद विकास समिति मकवानपुरका अध्यक्ष वेश खड्की, हेटौंडा १ का वडाध्यक्ष सविन न्यौपाने र १४ का वडाध्यक्ष दीपक खड्का लगायतको आतिथ्यता रहेको थियो ।