राष्ट्रपति रनिङ शिल्डः दुई राष्ट्रिय कीर्तिमान कायम

काठमाडौँ- सुदूरपश्चिम प्रदेशले १३ औँ केन्द्रस्तरीय राष्ट्रपति रनिङ शिल्ड खेलकुद प्रतियोगिताअन्तर्गत एथलेटिक्सको छात्र ४ गुणा ४०० मिटर रिलेमा जुनियर राष्ट्रिय कीर्तिमान बनाएको छ ।

चन्द्र बोहरा, अमित आउजी, कविर कामी र सुक्विर पोखरेलको टोलीले ३ मिनेट ३१.०० सेकेन्ड समयमा निर्धारित दूरी तय गर्दै नयाँ जुनियर राष्ट्रिय कीर्तिमान बनाएका हुन् ।

---

लुम्बिनी प्रदेशका सिमन पाण्डे, लेखनाथ महरा, बेद ओली र श्रवण केवतले २०७६ सालमा स्थापित गरेको ३ मिनेट ३२.३ सेकेन्डको कीर्तिमान सुदूरपश्चिमले भंग गरेको हो ।

यता लुम्बिनीका सुदीप थारुले एथलेटिक्सको लङजम्पमा जुनियर राष्ट्रिय कीर्तिमान कायम गरेका छन् ।

छात्रको लङजम्पमा सुदिपले ६.८४ मिटर जम्प गर्दै आफ्नै नाममा रहेको ६.६४ मिटरको कीर्तिमान सुधार गरेका हुन् ।