काभा महिला भलिबलः भारतसँग नखेल्दै नेपाल सेमिफाइनलमा

काठमाडौँ- नेपाल र भारत एनएससी काभा महिला भलिबल च्यालेन्ज कपको सेमिफाइनलमा प्रवेश गरेका छन् । समूह ‘ए’ मा लगातार दुई खेल जित्दै नेपाल र भारत एक खेलअगावै अन्तिम चारमा प्रवेश गरेका हुन् ।

समूह ‘ए’ अन्तर्गत राष्ट्रिय खेलकुद परिषद (राखेप) को कभर्डहलमा नेपालले आफ्नो दोस्रो खेलमा बंगलादेशलाई ३-० को सोझो सेटमा पराजित गरेको हो । यसअघि सोमबार नेपालले पहिलो खेलमा कीर्गिस्तानलाई ३-० को सोझो सेटमा पराजित गरेको थियो ।

---

यता भारतले भने पहिलो खेलमा बंगलादेश तथा दोस्रो खेलमा कीर्गिस्तानलाई पराजित गरेको थियो ।

आजको खेलमा नेपालले पहिलो सेट २५-१० ले जितेको थियो । नेपालले दोस्रो सेट २५-८ ले आफ्नो पक्षमा पार्‍यो । दोस्रो सेटमा कुनै समय नेपाल र बंगलादेश ७-७ को अवस्थामा रहेपनि त्यसपछि नेपालले उत्कृष्ट प्रदर्शन गरेको थियो । तेस्रो सेट भने नेपालले २५-९ ले जितेको हो ।

नेपालले समूह चरणको अन्तिम खेल भारतविरुद्ध बुधबार खेल्ने तालिका रहेको छ ।

समूह 'ए' मा नेपाल सहित भारत, बंगलादेश र कीर्गिस्तान रहेका छन् । समूह 'बी' मा भने श्रीलंका, माल्दिभ्स, काजकिस्तान र उज्वेकिस्तान रहेका छन् ।

समूह चरणको खेलपछि दुबै समूहबाट शीर्ष २ टोलीले सेमिफाइनलमा स्थान बनाउनेछन् । पुछारमा रहेका दुई टोलीले वरीयताका लागि प्रतिस्पर्धा गर्नेछन् ।