काभा महिला भलिबलः भारतसँग नेपाल पराजित

काठमाडौँ- एनएससी काभा महिला भलिबल च्यालेन्ज कपअन्तर्गत नेपालले भारतसँग पराजय भोगेको छ । त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बुधबार भएको समूह ‘ए’ को अन्तिम खेलमा नेपालले भारतसँग ३-१ को सेटमा पराजय भोगेको हो ।

यससँगै नेपाल समूह ‘ए’ को उपविजेताको रुपमा सेमिफाइनलमा प्रवेश गरेको छ । नेपालले यसअघि कीर्गिस्तान र बंगलादेशमाथि जित हात पारेको थियो । नेपालले सेमिफाइनलमा अब समूह ‘बी’ को विजेता काजकिस्तानविरुद्ध खेल्ने छ ।

---

भारत भने समूह ‘ए’ को विजेताको रुपमा अन्तिम चारमा प्रवेश गरेको हो । भारतले समूह चरणका तीनवटै खेलमा जित हात पार्‍यो । भारतले सेमिफाइनलमा अब समूह ‘बी’ को उपविजेता उज्वेकिस्तानको सामना गर्नेछ ।

बुधबारको खेलमा भारतले पहिलो सेट २५-१२ ले सहजै जितेपनि दोस्रो सेटमा भने २६-२४ को संघर्षपूर्ण जिते हात पारेको थियो । तेस्रो सेटमा भने नेपाल २५-२१ ले आफ्नो पक्षमा पार्‍यो ।

तर चौँथो सेटमा नेपालले कडा चुनौती दिएपनि खेल भने भारतले २५-२१ ले जित्यो ।