फ्रेन्च ओपन टेनिसः शीर्ष वरीयताका कार्लोस र जोकोभिचबीच भिडन्त हुने

काठमाडौँ- फ्रेन्च ओपन टेनिसअन्तर्गतको सेमिफाइनल खेल आज हुँदैछ। फ्रान्सको राजधानी पेरिसमा हुने पहिलो सेमिफाइनलमा विश्व नम्बर १ कार्लोस आल्कारेजले विश्व नम्बर ३ नोभाक जोकोभिचसँग खेल्नेछन् । कार्लोस र जोकोभिचबीचको खेल नेपाली समय अनुसार करिब ६:३० बजेपछि सुरु हुनेछ ।

२० वर्षीय आल्कारेज र ३६ वर्षीय जोकोभिचबीच दोस्रो पटक खेल हुन लागेको हो । यसअगि गत वर्ष स्पेनको मड्रिडमा भएको मड्रिड ओपनको सेमिफाइनलमा आल्कारेजले जोकोभिचलाई स्तव्ध पारेका थिए ।

---

आल्कारेज आफ्नो खेल जीवनकै दोस्रो ग्रान्ड स्लाम उपाधिको खोजिमा छन् । जोकोभिचसँग भने जारी फ्रेन्च ओपनको उपाधि जित्दै किर्तिमानी २३ औं ग्रान्ड स्लाम हात पार्न अवसर छ । सर्वियन जोकोभिच र स्पेनिस राफायल नाडालले समान २२ पटक ग्रान्ड स्लाम जितेका छन् ।

शुक्रबार नै हुने अर्को सेमिफाइनल खेलमा ओलम्पिक च्याम्पियन अलेक्जेन्डर जेरेभ र २०२२ फ्रेन्च ओपन उपविजेता क्यास्पर रुड भिड्दै छन् ।