डिभिलियर्स दक्षिण अफ्रिकी टिममा नफर्कने

काठमाडौँ: एबी डिभिलियर्सले सन् २०१८ मा अन्तराष्ट्रिय क्रिकेटबाट सन्यास लिएका थिए । यद्यपि केही दिन यता दक्षिण अफ्रिकी ब्याट्सम्यानको पुनरागमन सम्भावनाबारे चर्चा भइरहेको थियो । उनी राष्ट्रिय टोलीका प्रशिक्षक मार्क बोउचरसँग छलफल गरिरहेका थिए । 

यसै वर्ष भारतमा हुने टी-ट्वान्टी विश्वकपबाट डिभिलियर्स दक्षिण अफ्रिकी टिममा फर्कन सकने बताइएको थियो । तर अन्तिममा आएर डिभिलियर्सले आफू राष्ट्रिय टिममा नफर्कने निधो गरेका छन् । ‘एबी डिभिलियर्ससँगको छलफल सकिएको छ । उनले अन्ततः टिममा नफर्कने निर्णय गरेका छन्,’ दक्षिण अफ्रिकी क्रिकेट संघले जारी गरेको विज्ञप्तीमा भनिएको छ । 

---

स्थगित इन्डियन प्रिमियर लिग (आइपीएल) मा डिभिलियर्सले सात खेलमा कुल दुई सय सात रन बनाएका थिए । आइपीएलमा उनले देखाएको लयका कारण दक्षिण अफ्रिकाले उनलाई टिममा फिर्ता ल्याउन चाहेको थियो । पछिल्लो समय दक्षिण अफ्रिकी टिमले अपेक्षाकृत प्रदर्शन गर्न नसकिरहेकाले पनि डिभिलयर्सको सम्भावित पूनरागमनलाई महत्वका साथ हेरिएको थियो । 

यसैबीच दक्षिण अफ्रिकाले वेस्ट इन्डिज र आयरल्यान्ड भ्रमणका लागि टिम घोषणा गरेको छ । दक्षिण अफ्रिकाले आउँदो जुनमा वेस्ट इन्डिजसँग दुई टेस्ट र पाँच टि–ट्वान्टी खेल्ने तालिका छ । त्यस्तै, जुलाईमा दक्षिण अफ्रिका र आयरल्यान्ड भिड्दैछन् । दुई टिमले तीन एक दिवशिय र तीन टि–ट्वान्टी खेल्नेछन् ।