प्रादेशिक क्रिकेट संघ बागमतीको नेतृत्वमा लड्दै पारस, निर्वाचन जारी

काठमाडौँ- नेपाली राष्ट्रिय क्रिकेट टोलीका पूर्वकप्तान पारस खड्काले नेतृत्व गर्न चाहेको प्रादेशिक क्रिकेट संघ बागमती प्रदेशको निर्वाचन जारी छ ।

ललितपुरको धोबिघाटस्थित एक होटलमा शुक्रबार प्रादेशिक क्रिकेट संघ बागमती प्रदेशको दोस्रो साधारण सभा तथा निर्वाचनले नयाँ नेतृत्व चयन गर्दैछ । अहिलेसम्म पारस र चितवन जिल्ला क्रिकेट संघका प्रतिनिधि उमेश पियाले बागमतीको नेतृत्वमा दाबी गर्दैछन् । यद्यपि, शुक्रबार उद्घाटन सत्र सकिएलगत्तै वर्तमान बागमती प्रदेशका सचिव दुर्गाराज पाठकलगायत सर्वसम्मति गराउने प्रयासमा जुटेका छन् । बागमती प्रदेशमा कुल ३७ मत छ ।

---

त्यसमध्ये ६ जिल्लाबाट २४ र कार्यसमितिको १३ जना गरी कुल ३७ जनाले मतदान गर्न पाउनेछन् । उनीहरूको चयनबाट आगामी चार वर्षका लागि १३ सदस्यीय प्रादेशिक क्रिकेट संघ बागमती प्रदेशको नेतृत्व चयन हुनेछ । ६ जिल्ला र वर्तमान कार्यसमितिका ७ सदस्यीयले पारसलाई अध्यक्ष बनाउने सर्वसम्मतिसहित यसअघि नै पत्रकार सम्मेलन गरिसकेकाले उनको दावेदारी बलियो मानिएको छ । पत्रकार सम्मेलनमा चितवन र नुवाकोटलाई बाहिर राख्दै बाँकी चार जिल्लाले बाँकी पदमा भागबण्डा गर्ने यसअघि नै सार्वजनिक भइसकेको छ ।

शुक्रबार उद्घाटन सत्रमा प्रमुख अतिथि प्रदेश खेलकुद विकास समिति बागमती प्रदेशका सदस्यसचिव सूर्यलाल भण्डारीले यो साधारणसभाले आगामी कार्यकालका लागि सक्षम नेतृत्व चयन गर्ने विश्वास गर्दै बागमती प्रदेश खेलकुद परिषद् पनि सदैव सहकार्यका लागि तयार रहेको बताए ।

क्यानको नेतृत्व गर्ने लक्ष्यसहित राष्ट्रिय क्रिकेट टोलीबाट राजीनामा दिएका पारस प्रदेशको अध्यक्ष जित्दै क्यानको सचिवमा पनि लड्ने योजनामा छन् । उनी काठमाडौँ जिल्लाको सदस्य बन्दै प्रदेशको चुनाव लड्न प्रतिनिधि बनेका थिए । अब प्रदेश पनि जित्दै क्यानकै सचिव बन्ने लक्ष्यमा रहेको उनी निकट बताउँछन् ।

आइपिएस एसियाका कोषाध्यक्ष निरन्जन राजंवशीले पछिल्ला समय नेपाली क्रिकेटबाट आम मानिसका साथै क्रिकेटप्रेमीले धेरै अपेक्षा गरिरहेको र त्यसका लागि बागमती प्रदेश क्रिकेट संघले भूमिका खेल्न सक्ने विश्वास व्यक्त गरे ।