आयोजक एनएसआरए क्लब स्क्वास टिम च्याम्पियन

काठमाडौँ - आयोजक एनएसआरए टिम ‘ए’ ले एनएसआरए इन्टर क्लब स्क्वास टिम च्याम्पियनसीप २०२३ को उपाधि जितेको छ ।

शनिबार राति भएको फाइनलमा विदशी खेलाडीहरु सम्मिलित क्लब इन्टरनेसनललाई ३–० ले हराएर एनएसआरएले उपाधि जितेको हो ।

---

नेपाल स्क्वास र्याकेट्स संघको आयोजनामा सम्पन्न फाइनलअन्तर्गत भएको पहिलो खेलमा दीपक थापाले इसाक बेल हर्बटलाई ३–१ ले हराए ।

त्यसपछि उमित शाक्यले दोस्रा खेलमा इटालीका रेन्जो एन्डोर्नोलाई ३–१ ले नै पराजित गरे ।

तेस्रो खेलमा पनि दिव्यराज वज्राचार्यले धिर पुनलाई ३–१ सेटमा नै हराएर फाइनल क्लिनस्वीप गरे ।

ललितपुर जिल्ला खेलकुद विकास समितिका अध्यक्ष विनोद महर्जन र नेपाल स्क्वास र्याकेट्स संघका अध्यक्ष धु्रबबहादुर गुरुङले विजेता, उपविजेता र संयुक्तरुपमा तेस्रो स्थानमा रहेका एनएसआरए टिम ‘बी’ र एनएसआरए टिम ‘सी’ का खेलाडीहरुलाई ट्रफी तथा अन्य पुरस्कार प्रदान गरे ।