चर्च ब्वाईज यूनाईटेड ‘मुख्यमन्त्री कोहलपुर गोल्ड कप' को फाइनलमा प्रवेश

बुटवल- गोर्खा ब्वाईजलाई ३-० ले हराउँदै चर्च ब्वाईज यूनाईटेड ‘मुख्यमन्त्री कोहलपुर गोल्ड कप' को फाइनलमा प्रवेश गरेको छ । कोहलपुरस्थित तेह्र विघा मैदानमा शुक्रबार भएको खेलमा चर्च ब्वाईजका खेलाडी सुशान श्रेष्ठले ३६ औं मिनेटमा गोल गरेर खाता खोलेका थिए । 

त्यसपछि विशाल बस्नेतले ४७ औं र आरुज सिंहले ७६ औं मिनेटमा गोल गरेर टिमलाई जित दिलाए । खेल अवधिभर गोर्खा ब्वाईजका खेलाडीले धेरै पटक गोल हान्ने मौका गुमाए । शुक्रबारको खेलमा चर्च ब्वाईजका खेलाडी विशाल बस्नेत म्यान अफ द म्याच घोषित भए । उनले नगद ५ हजार प्राप्त गरेको खेल संयोजक रामबहादुर मल्लले जानकारी दिए । 

---

चर्च ब्वाईजले उद्घाटन खेलमा आयोजक रेसिङ साहारा क्लबलाई पराजित गरेको थियो । यस्तै गोर्खा ब्वाईजले बिहीबार सुदूरपश्चिम-११ लाई पराजित गरेर सेमिफाइनलकाे यात्रा तय गरेको थियो । 

प्रतियोगितामा शनिबार त्रिभुवन आर्मी फुटबल क्लब काठमाडौँ र वि.एफ.सी. चितवनबीच खेल हुने आयोजक रेसिङ सहारा क्लबका अध्यक्ष चक्र क्षेत्रीले जानकारी दिए । यही कात्तिक २२ गतेसम्म सञ्चालन हुने प्रतियोगितामा विभिन्न ८ टिम सहभागी छन् ।