लिभरपुल र म्यानचेस्टर युनाइटेडबीचको भिडन्त आज राति

काठमाडौँ- इंग्लिस प्रिमियर लिगअन्तर्गत शीर्ष स्थानको लिभरपुल र म्यानचेस्टर युनाइटेडबीचको खेल आज राति हुँदैछ ।

लिभरपुल र म्यानचेस्टर युनाइटेडबीचको खेल लिभरपुलको घरेलु मैदान एन्फिल्डमा नेपाली समयअनुसार राति १०:१५ बजेबाट सुरु हुनेछ ।

---

म्यानचेस्टर युनाइटेडविरुद्ध मैदानमा उत्रदा लिभरपुलको एउटै उद्देश्य भनेको ३ अंक प्राप्त गर्नु रहनेछ । आज रातिको खेलमा म्यानचेस्टर युनाइटेडलाई पराजित गरेको खण्डमा लिभरपुलले दोस्रो स्थानको आर्सनलसँगको दूरी ४ अंकमा पुर्‍याउने अवसर पाउनेछ ।

१६ खेल खेलेको लिभरपुलको ३७ अंक छ भने दोस्रो स्थानको आर्सनलको १६ खेलमा ३६ अंक छ ।

यता म्यानचेस्टर युनाइटेड भने लिभरपुललाई पराजित गरेर शीर्ष चारको लागि आफूलाई बलियो दाबेदारको रूपमा उभ्याउन चाहन्छ । म्यानचेस्टर युनाइटेड अहिले सातौँ स्थानमा छ । युनाइटेडले २७ अंक हात पारेको छ ।

प्रिमियर लिगअन्तर्गत आज राति नै आर्सनलले ब्राइटन, ब्रेन्टफोर्डले एस्टन भिल्ला तथा वेस्टहम युनाइटेडले उल्भ्सको सामना गर्ने तालिका रहेको छ ।