महिला राष्ट्रिय क्रिकेटः एपीएफ अपराजित रहँदै प्लेअफमा, सुदूरपश्चिमको पाँचौँ जित

काठमाडौँ- नेपाल एपीएफ क्लबले लगातार सात खेल जित्दै पीएम कप महिला राष्ट्रिय क्रिकेट प्रतियोगिताको प्लेअफमा पुगेको छ ।

शनिबार भएको लिग चरणको अन्तिम खेलमा एपीएफले बागमती प्रदेशलाई ४७ रनले पराजित गर्दै अघिल्लो चरणको यात्रा तय गरेको हो । एपीएफले खेलेका सातवटै खेलमा जित हात पार्‍यो ।

---

यता प्लेअफमा स्थान सुरक्षित गरिसकेको बागमतीले भने तेस्रो पराजय भोग्यो । बागमतीले यसअघि ४ खेल जित्दै प्लेअफमा स्थान बनाएको थियो ।

शनिबार मुलपानीमा भएको खेलमा एपीएफले दिएको १ सय २७ रनको लक्ष्य पछ्याउने क्रममा बागमतीले निर्धारित २० ओभरमा ८ विकेट गुमाउँदै ७९ रनमात्र बनाउन सक्यो ।

यसअघि टस हारेर पहिले ब्याटिङ गरेको एपीएफले निर्धारित २० ओभरमा ३ विकेटको क्षतिमा १ सय २६ रन बनाउँदा कप्तान सीता राना मगरले ४४ रनको योगदान गरिन् ।

कीर्तिपुरस्थित त्रिवि क्रिकेट मैदानमा भएको खेलमा भने सुदूरपश्चिम प्रदेशले गण्डकी प्रदेशलाई २४ रनले पाखा लगायो । अघिल्लो चरण प्रवेश गरिसकेको सुदूरपश्चिम प्रदेशको यो पाँचौँ जित हो ।

प्रतियोगिताबाट बाहिरिसकेको गण्डकीको भने यो पाँचौँ पराजय हो । उसले केवल एक खेलमा मात्र जित हात पारेको छ ।

शनिबार १ सय २८ रनको लक्ष्य पछ्याएको गण्डकीले निर्धारित २० ओभरमा २ विकेट गुमाउँदै १ सय ३ रनमात्र बनाउन सक्यो । सुमन खतिवडाले ४९ रन बनाएपनि गण्डकीलाई भने जित दिलाउन असफल रहिन् ।

यसअघि टस जितेर पहिले ब्याटिङ गरेको सुदूरपश्चिमले ६ विकेट गुमाउँदै १ सय २७ रन बनाएको थियो ।