ज्योती पाण्डले लिइन् नेपाली क्रिकेटबाट सन्यास

काठमाडौँ- नेपाली राष्ट्रिय महिला क्रिकेट टिमकी ओपनर तथा विकेटकिपर ज्योती पाण्डेले क्रिकेट खेलबाट सन्यास लिएकी छन् । उनले घरेलु तथा अन्तर्राष्ट्रिय क्रिकेट दुवै नखेल्ने घोषणा गरेकी हुन् ।

नेपाल एपीएफ क्लबलाई बुधबार पीएम कप महिला राष्ट्रिय क्रिकेट प्रतियोगिताको उपाधि दिलाएसँग ज्योतीले क्रिकेट खेलबाट सन्यासको घोषणा गरेकी हुन् ।

---

कीर्तिपुरस्थित त्रिवि क्रिकेट मैदानमा एपीएफले कोशी प्रदेशलाई ११ रनले पराजित गर्दै उपाधि जित्दा ज्योतीले एपीएफका लागि २७ रनको योगदान गरेकी थिइन् ।

नेपालका लागि १७ वटा टी-ट्वान्टी अन्तर्राष्ट्रिय खेल खेलेकी ज्योतीलाई प्रतियोगितापछि एपीएफका खेलाडीहरुले गार्ड अफ अनरसहित सम्मान गरे ।

नेपालका लागि अन्तिम खेलको रुपमा गत वर्ष मलेसियाविरुद्ध खेलेकी ज्योतीले सिनियर टोलीबाट पहिलो खेल भने सन् २०१६ मा थाईल्यान्डमा भएको एसिसी वुमन्स एसिया कपमा पाकिस्तानविरुद्ध खेलेकी थिइन् ।