आफ्नी प्रेमिकाको हत्या गरेका पिस्टोरियस जेलबाट छुट्ने

काठमाडौँ- आफ्नी प्रेमिकाको हत्या गरेर जेल परेका दक्षिण अफ्रिकाका पूर्व-पाराओलम्पियन ओस्कार पिस्टोरियस रिहा हुने भएका छन् ।

आफ्नी प्रेमिका रिभा स्टिनकाम्पलाई हत्या गरेका पिस्टोरियस ११ वर्षपछि शर्तसहित दक्षिण अफ्रिकाको जेलबाट छुट्ने भएका बीबीसीले जनाएको छ ।

---

३७ वर्षीय पिस्टोरियसले सन् २०१३ मा गोली प्रहार गरी रिभाको हत्या गरेका थिए र २०१५ मा उनलाई जेल सजाय तोकिएको थियो । तर उनी सन् २०१४ देखि जेलमा बस्दै आएका थिए ।

उनी जेलबाट रिहा भए पनि उनको जेल सजाय तोकिएको अवधि सन् २०२९ सम्म उनलाई उच्च निगरानीमा राखिनेछ ।

दक्षिण अफ्रिकामा अपराधीले तोकिएको सजायको आधा काटिसकेपछि जेलबाट छोड्ने नियम रहेको बीबीसीले उल्लेख गरेको छ ।