एक गोलले पछि परेको अवस्थालाई उल्टाउँदै बार्सिलोनाले जित निकाल्यो

काठमाडौँ- एक गोलले पछि परेको अवस्थालाई उल्टाउँदै बार्सिलोनाले स्पेनिस ला लिगामा जित निकालेको छ ।

बिहीबार राति भएको खेलमा बार्सिलोनाले लास पाल्मसलाई २-१ गोलअन्तरले पराजित गरेको हो ।

---

बार्सिलोनाको जितमा फेरान टोरेस र इल्के गुन्डोगानले एक-एक गोल गरे । लास पाल्मसका लागि मुनिर एई हाडाडीले एक गोल गरे ।

मुनिरले १२ औँ मिनेटमा गोल गर्दै लास पाल्मसलाई सुरुवाती अग्रता दिलाएका थिए । तर बार्सिलोनाका फेरानले ५५ औँ मिनेटमा बराबरी गोल गरे ।

तर दोस्रो हाफको इन्जुरी समयमा डाले सिंकग्राभेनले रातो कार्ड खाँदै मैदान बाहिरिएपछि लास पाल्मस १० खेलाडीमा सिमित भयो ।

यता पेनाल्टीमार्फत गुन्डोगानले गोल गर्दै बार्सिलोनाको जित सुनिश्चित गरे ।