टेनिस खेलाडी नाडालले यस वर्षको अस्ट्रेलियन ओपन गुमाउने

काठमाडौँ- स्पेनिस टेनिस खेलाडी राफायल नाडालले यस वर्षको अस्ट्रेलियन ओपन गुमाउने भएका छन् । अस्ट्रेलियाकै ब्रिसबेन इन्टरनेसनल टेनिस प्रतियोगिताका क्रममा घाइते भएपछि नाडाल स्पेन फर्किएका बीबीसीले जनाएको छ ।

घाइते भएकै कारण एक वर्षपछि मैदानमा फर्किएका ३७ वर्षीय नाडालले ब्रिसबेनमा सुरुवाती दुई खेल जितेपनि पुनः घाइते भएपछि क्वार्टरफाइनलमा जोर्डन थोम्पसनसँग पराजित हुन पुगेका थिए ।

---

दुई पटकका अस्ट्रेलियन ओपन विजेता नाडालले यसअघि नै सन् २०२४ खेल जीवनको अन्तिम वर्ष हुने बताएका थिए । यसअर्थमा यस वर्षको अस्ट्रेलियन ओपन उनका लागि अन्तिम हुने सम्भावना रहेको थियो ।

तर, घाइते भएपछि २२ पटकका ग्रान्ड स्लाम विजेता नाडालले उक्त अवसर पनि गुमाएका छन् ।