डोरिभल जुनियर ब्राजिल फुटबल टिमको मुख्य प्रशिक्षक नियुक्त हुने सम्भावना

काठमाडौँ- ब्राजिलियन फुटबल क्लब साओ पाउलोका मुख्य प्रशिक्षक डोरिभल जुनियर ब्राजिलको राष्ट्रिय फुटबल टिमको मुख्य प्रशिक्षक बन्ने सम्भावना बढेको छ ।

साओ पाउलोले सामाजिक सञ्जालमार्फत डोरिभलले क्लब छाडेको जनाएको छ । बीबीसीले उल्लेख गरेअनुसार डोरिभलले ब्राजिलको मुख्य प्रशिक्षक बन्ने उद्देश्यले साओ पाउलो क्लब छाडेका हुन् ।

---

तर ब्राजिलियन फुटबल कन्फेडेरेसनले डोरिभललाई मुख्य प्रशिक्षक नियुक्त गरिएको बारे अहिलेसम्म जानकारी भने गराएको छैन ।

गत शुक्रबार ब्राजिलियन फुटबल कन्फेडेरेसनले अन्तरिम प्रशिक्षक फर्नान्डो डिनिजलाई बर्खास्त गरेपछि ब्राजिलको राष्ट्रिय फुटबल टिम प्रशिक्षकविहीन छ ।

कन्फेडेरेसनले सन् २०२६ को विश्वकपको छनोटलाई ध्यानमा राख्दै स्थायी मुख्य प्रशिक्षक नियुक्त गर्न चाहेको छ ।