एसियन कपः आयोजक कतारको शानदार सुरुवात

काठमाडौँ- शुक्रबार रातिबाट कतारमा सुरु भएको एसियन कप फुटबल प्रतियोगितामा आयोजक कतारले शानदार सुरुवात गरेको छ ।

समूह 'ए' अन्तर्गत लुसेल स्टेडियममा भएको उद्‍घाटन खेलमा कतारले लेबनानलाई ३-० गोलअन्तरले पाखा लगाएको हो ।

---

८२ हजार दर्शकसामु भएको खेलमा कतारका लागि अक्रम अफिफले २ तथा अल्मोएज अलीले एक गोल गरे ।

अफिफले ४५ औँ मिनेटमा गोल गर्दै कतारलाई सुरुवाती अग्रता दिलाएका थिए भने अल्मोएजले ५६ औँ मिनेटमा अग्रता दोब्बर बनाए ।

अफिफले दोस्रो हाफको इन्जुरी समयमा गोल गरेपछि कतारले खेल आफ्नो पक्षमा पार्‍यो ।

एसियन कपअन्तर्गत शनिबार तीन खेल हुने तालिका रहेको छ । समूह 'ए' मा रहेको चीनले ताजकिस्तानविरुद्ध खेल्दा समूह 'बी' मा रहेको भारतले अस्ट्रेलिया तथा उज्बेकिस्तानले सिरियाविरुद्ध खेल्ने तालिका रहेको छ ।