केपी ओलीको जन्म दिन पारेर फागुन ११ देखि फुटबल प्रतियोगिता

काठमाडौँ- केपी ओली कप फुटबल प्रतियोगिताको दोस्रो संस्करण आगामी फागुन ११ गतेबाट सुरु हुने भएको छ ।

आयोजक राष्ट्रिय युवा संघ, नेपालले बुधबार काठमाडौँमा पत्रकार सम्मेलन आयोजना गर्दै प्रतियोगिता फागुन ११ देखि १९ गतेसम्म आयोजना गर्ने जानकारी गराएको हो ।

---

नेकपा एमालेका अध्यक्ष केपी ओलीको जन्म दिन पारेर फागुन ११ गतेबाट प्रतियोगिता आयोजना गर्न लागिएको आयोजकले जनाएको छ ।

'ए' डिभिजन क्लबसँगै भारतीय र भुटानी क्लबको सहभागिता रहने प्रतियोगिताका फाइनलबाहेकका खेल एन्फा टेक्निकल सेन्टर च्यासलमा हुने तथा फाइनल त्रिपुरेश्वरस्थित दशरथ रंगशालामा हुने छ ।

आयोजकले जनाएअनुसार विजेताले ११ लाख तथा उपविजेताले ५ लाख प्राप्त गर्नेछन् । त्यसैगरी, उत्कृष्ट खेलाडीले १ लाख, उत्कृष्ट गोलरक्षक, सर्वाधिक गोलकर्ता र उदयीमान खेलाडीले जनही ५० हजार प्राप्त गर्नेछन् ।

प्रत्येक खेलको म्यान अफ द म्याचलाई १५ हजार तथा प्रत्येक खेलको विजेता टिमलाई २५ हजार प्रदान गरिनेछ ।