साउदी अरेविया अन्तिम १६ मा पुग्दा थाइल्याण्ड र ओमानको बराबरी

काठमाडौँ- साउदी अरेवियाले कतारमा जारी एएफसी एसियन कप फुटबल प्रतियोगिताको अन्तिम १६ मा स्थान सुरक्षित गरेको छ ।

समूह 'एफ' अन्तर्गत आइतबार राति भएको खेलमा कीर्गिस्तानलाई २-० ले पराजित गर्दै साउदी अरेवियाले प्रि-क्वार्टरफाइनलमा स्थान सुरक्षित गरेको हो । साउदी अरेवियाले लगातार दुई खेल जित्दै अघिल्लो चरणको यात्रा तय गरेको हो ।

---

यता लगातार दुई खेलमा पराजय भोगेको कीर्गिस्तान भने समूह चरणबाटै बाहिरिएको छ ।

आइतबार राति साउदी अरेवियालाई जित दिलाउन मोहमद कानो र फैजल अल घाम्दीले एक-एक गोल गरे ।

यसै समूहमा रहेको थाइल्याण्डले ओमानसँग गोलरहित बराबरी खेल्दै अन्तिम १६ को सम्भावना कायमै राखेको छ ।

पहिलो खेल जितेको थाइल्याण्डले दुई खेलबाट चार अंक जोडेको छ । यता पहिलो खेलमा पराजय भोगेको ओमानको भने केवल एक अंक छ ।