इजिप्ट अफ्रिका कप अफ नेसन्सको नकआउटमा पुग्दा घाना बाहिरिने सम्भावना

काठमाडौँ- इजिप्ट अफ्रिका कप अफ नेसन्स फुटबल प्रतियोगिताको अन्तिम १६ मा पुग्दा घाना भने प्रतियोगिताबाट लगभग बाहिरिएको छ ।

समूह 'बी' अन्तर्गत सोमबार राति सम्पन्न खेलमा इजिप्टले केप भर्ड तथा घानाले मोजाम्बिकविरुद्ध बराबरी खेलेपछि इजिप्ट नकआउट चरणमा प्रवेश गरेको हो ।

---

आइभरी कोस्टमा जारी प्रतियोगिताअन्तर्गत केप भर्डसँग २-२ गोलको बराबरी खेलेको इजिप्टले ३ खेलबाट ३ अंक जोड्दै दोस्रो स्थानमा रहेर अघिल्लो चरण प्रवेश गर्‍यो । केप भर्डले भने ७ अंक जोड्दै शीर्ष स्थानमा रहेर अन्तिम १६ मा प्रवेश गर्‍यो ।

इजिप्टका लागि ट्रेजेक्वेट र मोस्ताफा मोहम्मदले एक-एक गोल गर्दा केप भर्डका लागि गिल्सोन ताभारेज र ब्रायन सिल्भाले एक-एक गोल गरे ।

यता मोजाम्बिकसँग २-२ गोलको बराबरी खेलेपछि घानाले भने केवल २ अंकमात्र जोड्न सक्यो । मोजाम्बिकको पनि २ अंक रहेपनि गोलअन्तरमा भने घानामाथि छ ।

घानाका लागि दुवै गोल जोर्डन अवेले गरे भने मोजाम्बिकका लागि सिपरियानो काटामो र इस्नार्ड मन्दाभाले एक-एक गोल गरे ।