अफ्रिका कप अफ नेसन्सः आइभरी कोस्ट र केप भर्ड क्वार्टरफाइनलमा

काठमाडौँ- आइभरी कोस्ट र केप भर्डले अफ्रिका कप अफ नेसन्स फुटबल प्रतियोगिताको क्वार्टरफाइनलमा स्थान सुरक्षित गरेका छन् ।

सोमबार राति भएको अन्तिम १६ को खेलमा आयोजक आइभरी कोस्टले साविक विजेता सेनेगललाई पेनाल्टी सुटआउटमा ५-४ गोलअन्तरले पराजित गर्दै अन्तिम ८ मा प्रवेश गरेको हो ।

---

निर्धारित र थप गरिएको समयमा दुवै टोलीले १-१ गोलको बराबरी खेलेका थिए । हबिब डियालोले चौँथों मिनेटमा गोल गर्दै सेनेगललाई अग्रता दिलाएपनि आइभरी कोस्टका फ्रान्क केस्सीले ८६ औँ मिनेटमा पेनाल्टीमार्फत बराबरी गोल गरे ।

त्यसपछि खेल पेनाल्टी सुटआउटबाट विजेताको टुंगो लागेको थियो ।

यता अर्को खेलमा केप भर्डले माउरिटिनियालाई १-० गोल अन्तरले पराजित गरे । केप भर्डको जितमा मेन्डेस डा ग्रासाले ८८ औँ मिनेटमा पेनाल्टीमार्फत विजयी गोल हाने ।