एसीसी प्रिमियर कपः नेपालको शानदार सुरुवात

काठमाडौँ- एसीसी महिला प्रिमियर कप क्रिकेट प्रतियोगितामा नेपालले शानदार सुरुवात गरेको छ ।

मलेसियाको क्वालालम्पुरमा शनिबार भएको खेलमा नेपालले हङकङलाई ८ विकेटले पराजित गरेको हो ।

---

हङकङले दिएको ९४ रनको लक्ष्य नेपालले १४ ओभर १ बलमा केवल दुई विकेट गुमाएर पूरा गर्‍यो । नेपालको जितमा कप्तान इन्दु बर्माले सर्वाधिक ४० तथा सीता राना मगरले ३६ रन जोडे ।

यसअघि टस हारेर पहिले ब्याटिङ गरेको हङकङले निर्धारित २० ओभरमा ८ विकेटको क्षतिमा ९३ रन बनायो । हङकङका लागि कप्तान चान का यिङ केरीले २१ तथा मारयम बिबिले १९ रन बनाए ।

नेपालका लागि पूजा महतो र रुविना क्षेत्रीले समान २-२ तथा कविता जोशी र सीता राना मगरले १-१ विकेट हात पारे ।