रुविनाको शतकमा नेपालले माल्दिभ्सलाई २१४ रनले हरायो

काठमाडौँ- मलेसियामा जारी एसीसी महिला प्रिमियर कप टी-ट्वान्टी क्रिकेट प्रतियोगितामा नेपालले माल्दिभ्समाथि शानदार जित हात पारेको छ ।

समूह 'डी' अन्तर्गत मंगलबार भएको खेलमा नेपालले माल्दिभ्सलाई २ सय १४ रनले पराजित गरेको हो ।

---

नेपालले दिएको २ सय २८ रनको लक्ष्य पछ्याएको माल्दिभ्सले १३ ओभर ५ बलमा सबै विकेट गुमाएर १३ रनमात्र बनाउन सक्यो ।

माल्दिभ्सलाई झिनो रनमा समेट्न अश्मिना कर्माचार्यले ४ तथा पूजा महतो र रुविना क्षेत्रीले ३-३ विकेट हात पारे ।

 यसअघि रुविना क्षेत्रीको कीर्तिमानी शतकमा नेपालले निर्धारित २० ओभरमा ४ विकेट गुमाउँदै २ सय २७ रन बनाएको थियो ।

नेपालका लागि रुविनाले ५९ बलमा अविजित रहँदै १० चौका र ५ छक्काको मदतमा १ सय १८ रन बनाइन् । टी-ट्वान्टी अन्तर्राष्ट्रियमा नेपाली महिला क्रिकेटरले शतक पूरा गरेको यो पहिलो पटक हो ।

त्यतिमात्र नभएर महिला अन्तर्राष्ट्रियमै नेपालका लागि रुविनाले बनाएको यो पहिलो शतक हो ।

पूजा महतोले ५९ रन जोडिन् ।