न्यूजिल्यान्डले जित्यो दक्षिण अफ्रिकाविरुद्धको टेस्ट सिरिज

काठमाडौँ- न्यूजिल्यान्डले पाहुना टोली दक्षिण अफ्रिकाविरुद्धको दुई खेलको टेस्ट सिरिज आफ्नो पोल्टामा पारेको छ ।

शुक्रबार सम्पन्न दोस्रो तथा अन्तिम खेल ७ विकेटले जित्दै न्यूजिल्यान्डले सिरिजमाथि २-० ले कब्जा जमाएको हो । यसअघि पहिलो खेल न्यूजिल्यान्डले २ सय ८१ रनले जितेको थियो ।

---

दोस्रो टेस्टमा जितका लागि चाहिएको २ सय ६७ रनको लक्ष्य न्यूजिल्यान्डले ३ विकेटको क्षतिमा पूरा गर्‍यो । न्यूजिल्यान्डलाई जित दिलाउन दोस्रो इनिङ्समा केन विलियम्सनले १ सय ३३ रनको योगदान गरे । विल योंगले ६० रन बनाए ।

दक्षिण अफ्रिकाका डेन पिटले ३ वटै विकेट हात पारे ।

दक्षिण अफ्रिकाले भने दोस्रो इनिङ्समा डेभिड बेडिङ्घमको १ सय १० रनको मदतमा २ सय ३५ रन बनाएपछि न्यूजिल्यान्डले २ सय ६७ रनको लक्ष्य पाएको थियो । न्यूजिल्यान्डका विलियम ओ'रोर्कले ५ विकेट हात पारे ।

यसअघि टस जितेर पहिले ब्याटिङ गरेको दक्षिण अफ्रिकाले पहिलो इनिङ्समा २ सय ४२ रन बनाउँदा रुआन डी स्वार्टले ६४ रन बनाए । न्यूजिल्यान्डका विलियम ओ'रोर्कले ४ विकेट हात पारे ।

न्यूजिल्यान्डले भने पहिलो इनिङ्समा २ सय ११ रनमात्र बनाएको थियो । उसका लागि केन विलियम्सनले सर्वाधिक ४३ रन बनाए ।

दक्षिण अफ्रिकाका डेन पिटले सर्वाधिक ५ विकेट हात पारे ।