अनिल र आशिफको अर्धशतकमा नेदरल्यान्ड्समाथि नेपालको शानदार जित

काठमाडौँ- आईसीसी पुरुष क्रिकेट विश्वकप लिग-२ अन्तर्गतको पहिलो त्रिकोणात्मक एकदिवसीय अन्तर्राष्ट्रिय सिरिजको दोस्रो खेलमा नेपालले नेदरल्यान्ड्समाथि शानदार जित हात पारेको छ ।

कीर्तिपुरस्थित त्रिवि क्रिकेट मैदानमा शनिबार भएको खेलमा नेपालले नेदरल्यान्ड्सलाई ९ विकेटले पराजित गरेको हो ।

---

जितका लागि चाहिएको १ सय ३८ रनको लक्ष्य नेपालले १५ ओभर २ बलमा १ विकेट गुमाएर पूरा गर्‍यो ।

नेपालको जितमा अनिल साहले अविजित ५७ रन तथा आशिफ शेखले अविजित ५४ रनको योगदान गरे । कुशल भुर्तेल ११ बल खेल्दै २ चौका र ३ छक्काको मदतमा २८ रन बनाएर आउट भए ।

नेदरल्यान्ड्सका भिभियन किंग्माले एक विकेट हात पारे ।

यसअघि टस हारेर पहिले ब्याटिङ गरेको नेदरल्यान्ड्सले ३९ ओभरमा सबै विकेट गुमाएर १ सय ३७ रनमात्र बनाएको हो ।

नेदरल्यान्ड्सका लागि बास डी लिडेले २७, सायब्रान्ड एङ्गलब्रेचले २३ तथा कप्तान स्कट इडवार्ड्सले ३३ रन बनाए । नोआह क्रोएसले १२ रन जोडे ।

नेपालका लागि कुशल भुर्तेलले ४ र ललित राजवंशीले २ तथा सोमपाल कामी र कप्तान रोहित पौडेलले १-१ विकेट हात पारे ।