दोस्रो जितसँगै एकदिवसीय सिरिज इंगल्यान्डलाई

काठमाडौँ : दोस्रो एकदिवसीय क्रिकेटमा इंगल्यान्डले श्रीलंकालाई हराएको छ । बिहीबार राती भएको खेलमा इंगल्यान्डले पाहुना टोली श्रीलंकालाई ८ विकेटले हराएको हो ।

ओभल मैदानमा पहिले ब्याटिङ गरेको श्रीलंकाले निर्धारित ५० ओभरमा ९ विकेट गुमाएर २४१ रन बनाएको थियो । श्रीलंकालाई मध्यम स्कोरमा रोक्न इंगल्यान्डका युवा बलर साम कुरानले ५ विकेट लिएका थिए । पाँच विकेट लिएका कुरान प्लेयर अफ दी म्याच पनि बने । 

---

जवाफी ब्याटिङ गरेको इंगल्यान्डले ४३ ओभरमै दुई विकेट गुमाएर २४२ रनको लक्ष्य भेट्टायो । उसका लागि कप्तान इयोन मोर्गनले नटआउट ७५ रनको योगदान दिए । दोस्रो एकदिवसीय जितसँगै इंगल्यान्डले तीन खेलको सिरिज पनि हात पारेको छ । अब तेस्रो तथा अन्तिम एकदिवसीय आइतबार ब्रिस्टोलमा हुनेछ ।