अर्को सिजन मेस्सीसँग खेल्न चाहन्छु : नेयमार

काठमाडौं : पेरिस सेन्ट जर्मेन (पिएसजी) का ब्राजिलियन फर्वाड नेयमारले आफु अर्को सिजन लियोनल मेस्सीसँग खेल्न इच्छुक रहेको बताएका छन् । सन् २०१७ मा फ्रान्स आउनुअघि नेयमारले मेस्सीसँग चार वर्ष बार्सिलोनामा सँगै खेलेका थिए । जहाँ उनीहरु दुईले अर्का दक्षिणी अमेरिकी फर्वाड लुइस स्वारेजसँग मिलेर बार्सिलोनालाई दुई ला लिगा, एक च्याम्पियन्स लिग र तीन कोपा डेल रेको उपाधि जिताएका थिए ।

'उनीसँग बार्सिलोनामा खेल्दा रमाइलो भएको थियो । म फेरि पनि उनीसँग एउटै टिममा खेल्न चाहान्छु' बुधबार च्याम्पियन्स लिगमा म्यानचेस्टर युनाइटेडविरुद्ध दुई गोल गरेपछि नेयमारले भने । 'अर्को सिजन हामी एउटै टिममा हुनुपर्छ । उनले मेरो स्थान लिन सक्छन् । उनको लागि म जुनसुकै भूमिकामा पनि खेल्न सक्छु,' नेयमारले हाँस्दै भने ।

---

त्यसो त मेस्सी अर्को सिजन बार्सिलोनामा रहने, नरहने टुङ्गो छैन । त्यसकारण उनी बार्सिलोना छाड्दा कता जाने हुन् भन्‍नेबारेमा हल्ला चल्न सुरु भइसक्यो । मेस्सीले ‘फ्रि-एजेन्ट’ भएर जारी सिजनको अन्त्यमा बार्सिलोना छाड्दा, म्यानचेस्टर सिटीदेखि पिएसजीसम्मका क्लबहरु अर्जेन्टिनियन फर्वाडलाई अनुबन्धन गर्न इच्छुक रहनेछन् ।

यता, सन् २०१७ मा बार्सिलोना छाडेका नेयमार, बीचमा स्पेन फर्किन नचाहेका होइनन् । तर मेस्सीले नै स्पेन छाड्ने सम्भावना बढेपछि नेयमार उनका पूर्व सहकर्मी फ्रान्स आउन भन्ने चाहन्छन् । च्याम्पियन्स लिगमा युनाइटेडलाई पराजित गरेपछि पिएसजीले समूह एचमा पाँच खेलबाट नौ अंक बनाएको छ । तर पराजित युनाइटेड र आरबी लाइपजिगको पनि समान नौ अंक नै भएकाले यस समूहबाट अर्को चरणमा पुग्ने टिमको छिनोफानो आउँदो साता मात्रै हुनेछ ।

पिएसजीले अब इस्तानबुल बासाकसिरको सामना गर्दैछ । टर्किस प्रतिद्वन्द्वीसँगको खेल बराबरीमा टुङ्गिए मात्रै पनि फ्रेन्च टोली अन्तिम १६ मा प्रवेश गर्नेछ । समूहकै अर्को खेलमा युनाइटेड र लाइपजिग भिड्नेछन् । त्यस खेलमा विजय हुने टिमले पिएसजीसँगै अर्को चरणमा स्थान पक्का गर्नेछ । (अन्तराष्ट्रिय सञ्चार माध्यमहरुको सहयोगमा)