दशरथ रंगशालामा दर्शक देख्दा दंग परे भारतीय कप्तान सुनिल

काठमाडौँ - सुनिल क्षेत्री भारतीय फुटबल टिमका कप्तान मात्र होइनन्, निर्विवाद रुपमा समग्र भारतीय फुटबलकै सबैभन्दा ठूला स्टार हुन् । ३७ वर्षीय स्ट्राइकरले भारतका लागि एक सय १७ खेल खेल्दा ७४ गोल गरेका छन् । भारतीय टिम मैत्रीपूर्ण खेलका लागि नेपाल आइपुग्दा अपेक्षा सुनिलले स्तरिय खेल देखाउँछन् भन्ने थियो ।

सुनिलले निराश बनाएनन् । आइतबारको खेलमा उनले एक गोल त गरे नै साथी खेलाडीलाई असिस्ट पनि दिए । पहिलो खेल १–१ को बराबरीमा टुंगिदा भारतीय टिमबाट भएको गोलमा सुनिलको संलग्नता थियो । यसअर्थमा उनका लागि नेपाल भ्रमण निराश बनेन । 

---

जित बाहेक अर्को कारणले पनि सुनिल दंग देखिए । कारण बने दशरथ रंगशालामा उपस्थित दर्शक । ‘हामीले पछिल्ला डेढ वा दुई वर्ष दर्शकविनाको रंगशालामा खेल्यौँ । नेपालमा दर्शकले भरिएको मैदानमा खेल्न पाउँदा खुशी लागेको छ । हुन त यी दर्शक हाम्रो विपक्षमा थिए । यद्यपि दर्शकले भरिएको रंगशालामा खेल्न पाउँदा बेग्लै किसिमको मज्जा आउँछ,’ नेपालसँगको दोस्रो खेलपछि सुनिलले भने । 

आइतबार साँझ गोल पनि गरेका सुनिलले नेपालविरुद्ध खेल्न सजिलो नभएको पनि स्विकार गरे । ‘नेपालसँगको खेल अवश्य पनि सजिलो हुँदैन । आजको खेलमा नेपाली खेलाडीहरुले असाध्यै राम्रो डिफेन्ड गरे । हामीले गोल गर्न र उनीहरुलाई गोल गर्न नदिन धेरै मेहेनत गर्नुपर्‍यो,’ उनले भने । 

भारतीय कप्तानले आसन्न साफका अगाडि भएको मैत्रीपूर्ण खेलमा जित निकाल्दा आत्मविश्वास बढ्ने बताए । ‘खेल जितियो । यसले हामीलाई अवश्य पनि खुशी बनाएको छ । तर हाम्रो प्रदर्शनमा सुधारको पनि जरुरी छ,’ सुनिलको भनाइ थियो ।