विश्वकप छनौटमा ब्राजिल र अर्जेन्टिना अघि बढ्दै

काठमाडौँ- नेयमार चम्किँएपछि ब्राजिलले विश्वकप छनौटमा शुक्रबार पेरुलाई २-० ले पराजित गरेको छ । ब्राजिलको आफ्नै मैदानमा भएको खेलमा नेयमारले एक गोल गरे भने एभर्टन रिबेरोलाई गोलको पास उपलब्ध गराए । 

विश्वकप छनौटको पछिल्लो खेलमा चिलीविरुद्ध निर्णयक गोल गरेका रिबेरोले पेरुसँगको खेलमा १५ औँ मिनेटमै ब्राजिललाई अग्रता दिलाए । पहिलो हाफमै ब्राजिलले अग्रता दोब्बर बनायो । ४० औँ मिनेटमा नेयमारले विजयी टिमको दोस्रो गोल गरे । 

---

विश्वकप छनौटमा पेरुविरुद्ध लगातार १३ औँ जित निकालेसँगै ब्राजिलले २४ अंक बनाएको छ । १० टिम सम्मिलत दक्षिण अमेरिकातर्फको विश्वकप छनौटमा अर्जेन्टिना दोस्रो स्थानमा छ । 

बिहीबार राति नै अर्जेन्टिनाले पनि बोलिभियालाई पराजित गरेको थियो । अर्जेन्टिनाले ३-० को सहज जित हासिल गर्दा विजयी टिमका सबै गोल लियोनल मेस्सीले गरे ।कप्तान मेस्सीले १४ औँ, ६४ औँ र ८८ औँ मिनेटमा गोल गरे । 

दक्षिण अमेरिकाबाट चार टिम स्वत कतार विश्वकपका लागि छनौट हुनेछन् । पाचौँ हुने टिमले भने महदेशीय प्ले-अफ खेल्नेछ ।