ईपीएलमा अपराजित चितवन टाइगर्स

काठमाडौँ- बिहीबार काठमाडौँ किंग्सलाई हराउँदै चितवन टाइगर्स एभेरेष्ट प्रिमियर लिगको शीर्षस्थानमा उक्लेको छ । कीर्तिपुरस्थित त्रिभुवन विश्वविद्यालयको मैदानमा भएको खेलमा टाइगर्सले तीन विकेटको जित हात पारेको हो । जितसँगै चितवनको दुई खेलबाट चार अंक भएको छ । पराजित काठमाडौँ एक जितसहित चौँथो स्थानमा छ । 

टस हारेर ब्याटिङ गरेको काठमाडौँले निर्धारित २० ओभरमा आठ विकेटको क्षतिमा १४१ रनको योगफल तयार पार्‍यो । काठमाडौँले दिएको लक्ष्य चितवनले १८.४ ओभरमा सात विकेट गुमाएर पूरा गर्‍यो । 

---

काठमाडौँका लागि ओपनर सुवास खकुरेलले सर्वाधिक ३५ रन बनाए । ३४ बल सामना गरेका सुवासले दुई छक्का र दुई चौका प्रहार गरे । त्यसैगरी राजु रिजालले २८ रन जोडे भने जनक प्रकाशले २६ रनको योगदान गरे । बाँकी ब्याट्सम्यानले दोहोरो अंक जोड्न सकेनन् । 

बलिङतर्फ चितवनका लागि सागर ढकालले चार विकेट हात पारे । किफायती बलिङ गरेका सागरले २१ रन खर्चिए । त्यसैगरी करिम जनतको नाममा दुई विकेट रह्यो भने कमल ऐरी र सिकुगे प्रसन्नले समान एक–एक विकेट लिए । 

चितवनका राजेश पुलामीले अविजित २६ रनको योगदान गरे । कमल ऐरीले २३ रन जोडे । उनी पनि नट आउट रहे । विजयी टिमका लागि दिलिप नाथ, करिम जनत र मोहम्मद शाहजादले क्रमशः २३, २१ र १७ रन बनाए । 

काठमाडौँका जितेन्द्र मुखिया र रायन बर्लले समान दुई–दुई विकेट लिए । यसैगरी, जनक प्रकाश, गुल्शन झा र सन्दिप लामिछानेले एक–एक विकेट हात पारे ।