काठमाडौँ- बंगलादेशको ढाकामा जारी एसियन सेन्ट्रल जोन भलिबल च्यालेन्ज कपको पुरुषतर्फको आफ्नो पहिलो खेलमा नेपाल बंगलादेशसँग पराजित भएको छ । नेपाल घरेलु टिमसँग तीनवटै सेटमा पराजित भयो । 

पहिलो सेट २५–१७ ले गुमाएको नेपाल दोस्रो सेट पनि उही अन्तरमा पछि पर्‍यो । नेपाललाई सोझो सेटमा पराजित गर्न बंगलादेशले तेस्रो सेट २५–१९ ले जित्यो । 

---

महिलातर्फ नेपालले बिहीबार नै श्रीलंकामाथि ३–२ को जित हासिल गरेको थियो । तर पुरुषतर्फ भने नेपालले एक सेट पनि जित्‍न सकेन । 

राउन्ड रोबिनमा भइरहेको यो प्रतियोगिता पुरुषतर्फ चार टिम प्रतिस्पर्धामा छन् । नेपालले अब आफ्नो दोस्रो खेलमा शुक्रबार उज्वेकिस्तानको सामना गर्दैछ । सोही दिन बंगलादेश र श्रीलंका पनि प्रतिस्पर्धामा उत्रनेछन् ।