टाइगर कप : पुरुषतर्फ आर्मी र हेल्प नेपाल फाइनलमा

काठमाडौँ -  टाइगर कप महिला तथा पुरुष भलिबल प्रतियोगिताको दोस्रो संस्करणको पुरुषतर्फको उपाधिका लागि विभागीय टिम त्रिभुवन आर्मी क्लब र हेल्प नेपालले प्रतिस्पर्धा गर्ने भएका छन् । शुक्रबार भएको खेलमा विजयी हुँदै आर्मी र हेल्प नेपाल फाइनल प्रवेश गरेका हुन् । 

पहिलो खेलमा साबिक विजेता गण्डकी प्रदेशलाई ३–० को सोझो सेटमा पराजित गर्दै हेल्प नेपाल पहिलो पटक फाइनल प्रवेश गर्‍यो । पहिलो पटक प्रतियोगितामा सहभागी भएको हेल्प नेपालले २५–१८, २५–१६, २५–२३ ले सहज जित हासिल गर्‍यो । 

---

दोस्रो खेलमा आर्मीले अर्को विभागीय प्रतिद्वन्द्वी नेपाल पुलिस क्लबलाई ३–० को सोझो सेटमा पराजित गर्‍यो । राष्ट्रिय टिमका खेलाडीले भरिएको आर्मीले पुलिसलाई २५–१५, २५–१८, २५–१३ ले पराजित गर्दै लगातार दोस्रो पटक फाइनलमा प्रवेश गर्‍यो । फाइनल खेल शनिबार २ बजे हुनेछ ।