च्यासलविरुद्धको खेलमा गम्भीर घाइते भएका मनिष डाँगी खतरामुक्त

काठमाडौं–च्यासल विरुद्धको खेलमा गम्भीर चोट बोकेर अस्पताल लगिएको मछिन्द्रका मिडफिल्डर मनिष डाँगी खतरामुक्त रहेका छन् । सहिद स्मारक ए डिभिजन लिगमा शनिबार टाउकोमा चोट लागेपछि मनिषलाई अस्पताल लगिएको हो । उनलाई रंगशाला नजिकको ब्लु क्रस लगिएको थियो।

अस्पतालले एक विज्ञप्ति जारी गर्दै अवस्था सामान्य रहेको जनाएको हो । उनलाई आकस्मिक कक्षमा राखेर उपचार गरिएको थियो। ‘च्यासलविरुद्धको खेलमा मनिषको टाउकोमा चोट लागेको थियो । अहिले उनको अवस्था सामान्य र स्थिर रहेको छ । थप जानकारी पछि दिइने छ । उनी खतरामुक्त छन्,’ विज्ञप्तिमा भनिएको छ ।

---

मनिष खेलको ६१ औं मिनेटमा मैदानमा प्रवेश गरेका थिए । सुनलि बलको स्थानमा उनी मेदानमा छिरेका हुन्। विपक्षी खेलाडी यान्निक केट्चासँग ठोक्किदा मनिष टाउकोमा चोट लागेर मैदानमा ढलेका थिए । 

मछिन्द्रका फरवार्ड विमल घर्तीमगरले म्यान अफ दी म्याच घाइते सहकर्मी मनिष डाँगीलाई समर्पण गरेका थिए। मछिन्द्रले च्यासललाई २–० ले पराजित गर्दै लिगको १०औं खेलसम्म अपराजित रहेको छ।