म्यानचेष्टर सिटी तेस्रो स्थानमा

काठमाडौं : इंग्लिस प्रिमियर लिग फूटबलमा म्यानचेष्टर सिटी तेस्रो स्थानमा उक्लिएको छ । बुधबार राती भएको खेलमा ब्राइटनलाई १-० गोलले हराउँदै सिटी तेस्रो स्थानमा उक्लिएको हो । सिटीलाई जिताउन एक मात्रै गोल फील फोडेनले गरेका थिए । उनले पहिलो हाफको ४४ औँ मिनेटमा गोल गरेका हुन् । 

ब्राइटनको पोष्टमा १६ वटा प्रहार गरेको सिटीले संघर्षपूर्ण रुपमा साँघुरो जित निकालेको हो । खेलको अतिरिक्त समयमा रहिम स्ट्रर्लिङले गोल गर्ने अवसर पाएपनि उनी पेनाल्टीमा चुकेका थिए ।

---

जितसँगै १७ खेलबाट ३२ अंक जोडेको सिटी तेस्रो स्थानमा उक्लिएको छ । समान अंक भएपनि लेस्टर सिटी चौथो स्थानमा झरेको छ । एक खेल बढी खेलेको लिभरपुल ३३ अंकसहित दोस्रो स्थानमा छ भने म्यानचेष्टर युनाईटेड ३६ अंकसहित शीर्ष स्थानमा छ । 

हार व्यहोरेको ब्राइटन भने रेलिगेसनबाट एक स्थान माथि छ ।