प्रिमियर लिगमा लिभरपुलको खराब कीर्तिमान

काठमाडौं : प्रिमियर लिगमा आइतबार राति म्यानचेस्टर युनाइटेडसँग गोलरहित बराबरी खेलेसँगै  लिभरपुल तीन खेलमा लगातार गोल गर्न चुकेको छ । लिभरपुलले लिगका तीन खेलमा गोल गर्न असफल भएको यो सन् २००५ मार्च यता पहिलो पटक हो । 

युनाइटेडसँगको खेल भन्दा अगाडि लिभरपुलले साउथह्याम्पटन र न्यूकासल युनाइटेडविरुध्‍द पनि गोल गर्न सकेको थिएन । पारम्पारिक प्रतिद्वन्द्वीसँग बराबरी खेलेसँगै लिभरपुल लिग अंक तालिकामा चौथौं स्थानमा झरेको छ । १८ खेलबाट ३४ अंक बटुलेको लिभरपुललाई लेस्टर सिटी र म्यानचेस्टर सिटीले उछिनेका छन् । बराबरीको बाबजुद पनि युनाइटेड भने शीर्षस्थानमा छ ।  

---

डिफेन्डिङ च्याम्पियन भएर लिगमा सरासर तीन खेलमा गोल गर्न नसक्ने टिमको सूचीमा लिभरपुल पनि समेटिएको छ । यसअघि डिफेन्डिङ च्याम्पियन हुँदा गोल गर्न नसकने टिमका रुपमा आर्सनल र लेस्टर दर्ज थिए । आर्सनलले १९९८-९९ र लेस्टरले २०१६-१७ सिजनमा लगातार तीन खेलमा गोल गर्न असमर्थ भएका थिए । 

खराब लयमा रहेको लिभरपुलले लगातार चार खेलमा जित दर्ता गर्न सकेको छैन । ती खेलहरुमा योर्गेन क्लपका स्टार फरवार्डहरूले एक गोल मात्रै गर्न सकेका छन् । त्यसो त लिभरपुलले एनफिल्डमा अपराजित यात्रालाई कायम राखेको छ । सन् २०१७ को अप्रिलमा क्रिस्टल प्यालेससँग हारेपछि लिभरपुल घरेलु मैदानमा ६८ खेलमा अपराजित छ ।