महिला फुटबल लिग : आर्मी र पुलिसको गोलरहित बराबरी

काठमाडौं : राष्ट्रिय महिला लिग फुटबलको उदघाटन खेलमा दुई विभागीय टोली त्रिभुवन आर्मी क्लब र नेपाल पुलिस क्लबले गोलरहित बराबरी खेलेका छन् । बुधबार दशरथ रंगशालामा भएको खेलमा दुवै टिमले पाएका अवसरलाई गोलमा परिणत गर्न नसकेपछि लिगको पहिलो खेलमा गोल भएन । 

खेलपछि पत्रकारहरूसँग कुरा गर्दै पुुलिसका प्रशिक्षक सन्जिव जोशीले नतिजाप्रति सन्तुष्टी व्यक्त गरे । ‘विभागीय प्रतिद्वन्द्वीविरुद्धको बराबरी खराब नतिजा होइन । हामीले लिगका लागि दुई महिना लामो तयारी गरेका छौं । त्यसकारण आउँदा खेलमा राम्रो गर्ने आशा छ,’ प्रशिक्षक जोशीले भने ।

---

उता आर्मीका प्रशिक्षक राजु तामाङले आफ्ना फरर्वाडहरूले राम्रो खेल्न नसकेको प्रतिक्रिया दिए । खेलमा पुलिसकी पुजा राना प्लेयर अफ दि म्याच घोषित भइन् । 

बिहीबारको पहिलो खेलमा शशस्त्र प्रहरीको एपीएफ र चन्द्रपुर नगरपालिका भिड्नेछन् भने दोस्रो खेलमा वालिङ नगरपालिका र बिराटनगर महानगरपालिका आमने-सामने हुनेछन् ।