महिला लिगः  पुलिसको पहिलो जित

काठमाडौँ : काठमाडौँमा जारी राष्ट्रिय महिला फुटबल लिगमा नेपाल पुलिस क्लबले पहिलो जित दर्ता गरेको छ । लिगको उद्घाटन खेलमा त्रिभुवन आर्मी क्लबसँग बराबरी खेलेको पुलिसले शुक्रबार चौदण्डीगढी नगरपालिकालाई ६–० ले पराजित गर्‍याे । 

सातदाबाटोस्थित एन्फा मैदानमा सम्पन्न खेलमा पुलिसका लागि रेखा पौडेल र सिर्जना खड्काले दुई–दुई गोल गरे । त्यस्तै, अमृता जैसी र निर्मला विकले समान एक–एक गोल गरे । 

---

जितपछि पुलिसका प्रशिक्षक सन्जिव जोशीले नयाँ खेलाडीहरुले टिमका लागि राम्रो प्रदर्शन गरेको प्रतिक्रिया दिए । ‘अवश्य पनि जितले हामीलाई उत्साहित बनाएको छ । हामीले आज बेन्चको पूर्ण उपयोग गर्‍याै । नयाँ खेलाडीहरुले समेत राम्रो खेले ।’ जोशीले भने । 

खेलमा रेखा पौडेलले पुलिसलाई २८ औ मिनेटमा अग्रता दिलाइन् । अमृता जैसीले ४१ औ मिनेटमा पुलिसको अग्रता दोब्बर बनाइन । त्यस्तै निर्मला विकले पहिलो हाफको अन्त्यमा पुलिसको अग्रता ३–० बनाइन् । दोस्रो हाफमा सिर्जना खड्काले दुई गोल गरिन् भने पौडेलले ब्यक्तिगत दोस्रो गोल गरिन् । 

उता पराजित चौदण्डीगढीका प्रशिशक्षक दिपक थापाले हारका बाबजुद पनि सन्तुष्टि ब्यक्त गरे । ‘हाम्रो खेलाडीहरुसँग कम अनुभव छ । त्यसकारण पुलिस जस्तो टिमसँग हार्नु स्वभाविक हो । हारमा पनि सकरात्मक हुनुपर्ने जरुरी छ । हामीले राष्ट्रिय लिगमा सहभागी हुन मौका पाउनु नै ठूलो कुरा हो ।’ थापाको भनाई थियो ।