प्रधानमन्त्री कपः कार्कीको प्रेरणादायी प्रदर्शनमा लुम्बिनीको जित

काठमाडौँ : प्रधानमन्त्री कप पुरुष राष्ट्रिय क्रिकेट प्रतियोगितामा लुम्बिनी प्रदेशले दोस्रो जित हात पारेको छ । मुलपानी क्रिकेट मैदानमा शनिबार सम्पन्‍न खेलमा लुम्बिनीले सुदुरपश्‍चिम प्रदेशलाई ६ विकेटले पराजित गर्‍यो । जितसँगै लुम्बिनीले प्रतियोगिताको अन्तिम चारमा स्थान बनायो भने पराजित सुदुरपश्‍चिम भने बाहिरियो । 

टस जितेर फिल्डिङ गर्ने निर्णय गरेको लुम्बिनीले सुदुरपश्‍चिमलाई ६२ रनमै समेट्यो । लुम्बिनीका कप्तान कृष्ण कार्कीले धारिलो बलिङ गरेपछि सुदुरपश्‍चिमले २७.४ ओभरमा सम्पूर्ण विकेट गुमायो । उता लुम्बिनीले १४.५ ओभरमा चार विकेटको क्षतिमा ६४ रन बनायो । 

---

सुदुरपश्‍चिमका लागि दुई ब्याट्सम्यानले बाहेक अन्यले दोहारो अंक छुन सकेनन् । पराजित टोलीका तर्फबाट नारायण जोशीले सर्वाधिक १७ रन बनाए भने कप्तान सन्तोष भट्टले ११ रन जोडे । सुदरपश्‍चिमका ओपनरद्वय खडक बोहोरा र सन्जु दमाई क्रमशः सात र आठ रन बनाउँदै पभेलियन फर्के । त्यस्तै चार खेलाडी शुन्य रनमा सिमित भए । 

लुम्बिनीका लागि अनिल खरेल र विक्रम भुसालले समान दुई/दुई विकेट लिए भने सन्दिप सुनार र दिपेन्द्र रावतले एक/एक विकेट हात पारे । 

लुम्बिनीका लागि सौरभ खनालले अविजित १८ रन बनाए । जुन विजेताका लागि सर्वाधिक स्कोर थियो । लुम्बिनीका ओपनरहरूले खराब सुरुवात गर्दा खनालबाहेक कप्तान कार्कीले जोडेको १५ रन पनि महत्वपूर्ण रह्यो । त्यस्तै, प्रकाश केसीले अविजित १७ रनको योगदान गरे । सुदुरपश्‍चिमका शेर मल्लले दुई विकेट लिए भने विनोद लामाले एक विकेट हात पारे ।